Рӯзи 22 апрели соли 2025 дар толори муассисаи таҳсилоти миёнаи умумии №10-и ноҳияи Ҷалолиддини Балхӣ семинари омӯзишии ноҳиявӣ баргузор гардид. Дар он муовини раиси ноҳияи Ҷалолиддини Балхӣ Шукурзода Шаҳло, намояндагони шуъбаи маорифи ноҳия ва муассисаи таҳсилоти иловагӣ, омӯзгорон ва хонандагони фаъоли тамоми муассисаҳои таълимии ноҳия иштирок намуданд.

 Мақсади асосии баргузории семинар омодасозии фаъолон барои иштирок дар озмуни ҷумҳуриявии “Фурӯғи субҳи доноӣ китоб аст”, расондани тарзу усули дурусти ҳуҷҷатгузорӣ ва пешниҳоди корҳои эҷодӣ ба масъулин буд. Мутахассисони соҳа иштирокчиёнро бо номгӯи номинатсияҳои озмун, талаботи асосӣ, усули таҳияи корҳо, тартиби пешниҳоди мавод ва ҳуҷҷатҳо шинос намуданд.

Муовини раиси ноҳия Шукурзода Шаҳло дар суханронии худ таъкид намуд, ки баргузории чунин семинарҳо барои баланд бардоштани сатҳи маърифатнокӣ, боло бурдани завқи китобхонӣ ва рушди қобилиятҳои эҷодии хонандагон аҳамияти калон дорад.

Хонандагон бо ҳавасмандӣ иштирок намуда, саволҳои худро оид ба ҷараёни озмун ва ҳуҷҷатгузорӣ пешниҳод карданд, ки аз ҷониби мутахассисон ҷавобҳои муфассал гирифтанд. Дар фарҷом таъкид гардид, ки иштироки фаъол ва пурмазмуни хонандагон дар озмуни “Фурӯғи субҳи доноӣ - китоб аст” метавонад на танҳо ба ғолибият, балки ба ташаккули ҷаҳонбинии васеъ ва малакаҳои эҷодии онҳо мусоидат намояд.

Имрӯз, 16 апрели соли 2025, бо иштироки муовини раиси ноҳияи Ҷалолиддини Балхӣ оид ба соҳаи иҷтимоӣ Шукурзода Шаҳло ва намояндаи шуъбаи маориф Сафарбек Холов, дар муассисаҳои таълимии №45, №47 ва №68-и Ҷамоати деҳоти Навоӣ, усули "Мактаб ба мактаб" доир гардид. Чорабинӣ бо мақсади мусоидат ба пешгирии шомилшавии ҷавонону наврасон ба гурӯҳҳои ифротгароӣ, баланд бардоштани ҳисси масъулияти иҷтимоии хонандагон ва тарғиби арзишҳои ахлоқӣ ва фарҳангии баргузор шуд.

Муовини раиси ноҳия Шукурзода Шаҳло дар суханронии худ ба аҳамияти мубориза бо қавмгароии наврасон ва тақвияти ҳуқуқи иҷтимоии ҷавонон диққат дод. Вай дар вокуниш ба шомилшавии баъзе ҷавонзанон ба гурӯҳҳои ифротгаро таъкид намуд, ки бояд таваҷҷуҳи хос ба таҳкими тарбия ва муҳити солим дар мактабҳо бошад, то наврасон, ки барои ояндаи фардо раҳнамои ҷомеа хоҳанд буд, тарбияи дуруст гиранд.

Шукурзода Шаҳло бо ишора ба нақши муассисаҳои таълимӣ дар тарбияи ахлоқии хонандагон, ҳадафи аслӣ, яъне таъмини муҳити ором ва бехатар дар мактабҳо ва муҳити атрофро барои кӯдакону наврасон, дар байни ҷамъияти мактабӣ шарҳ дод. Дар идома масъулин дар бораи аҳамияти риояи одоби либоспӯшии занону духтарон ва аҳамияти маданӣ, фарҳангӣ ва иҷтимоии он суханронӣ карданд.

 Таъкид гардид, ки ҳар як омӯзгор ва иштирокчии чорабинӣ бояд ба тарзи либоспӯшиҳои ҷавонон, аз ҷумла хонандагон ва эҳтироми рамзи фарҳанги миллии хеш таваҷҷуҳ кунад. Зеро он дар рушди ахлоқи ҷомеа ва эътимод ба ояндаи кишвар нақши муҳим дорад. Сипас, масъулин оид ба муҳимияти тарғиби китобхонӣ ва маърифати фарҳангӣ барои ташаккули афкори мустақил ва арзишҳои гуманистӣ дар байни наврасон ва ҷавонон низ изҳороти муҳим намуданд.

 Чорабинӣ бо қобили қаноатмандии хонандагон ва омӯзгорон баргузор шуд. Ба гуфтаи масъулин, иқдоми "Мактаб ба мактаб" ба маърифати иҷтимоии ҷавонон таъсири мусбат гузошта, роҳҳои муҳими пешгирии шомилшавии ҷавонон ба гурӯҳҳои ифротгароӣ ва фаъолияти онҳо дар самти илму фарҳангро таҳким мебахшад.

   Имрӯз, 15 апрели соли 2025, бахшида ба Рӯзи устод Садриддин Айнӣ - бунёдгузори адабиёти навини тоҷик, шахсияти барҷастаи илму адаб ва Қаҳрамони Тоҷикистон, дар Китобхонаи марказии ноҳияи Ҷалолиддини Балхӣ чорабинии маърифатӣ - фарҳангӣ баргузор гардид. Дар ин чорабинӣ кормандон ва хонандагони фаъоли китобхона иштирок намуданд.

Ҳадафи баргузории чунин чорабиниҳо арҷгузорӣ ба шахсият ва мероси илмиву адабии устод Айнӣ, тарғиби маърифати китобхонӣ ва бедор кардани эҳсоси ифтихор аз фарҳанги миллист. Дар ҷараёни чорабинӣ иштирокчиён доир ба ҳаёт ва фаъолияти илмӣ ва адабии Садриддин Айнӣ маълумоти муфассал гирифтанд.

Ҳамчунин, китобҳои навиштаи устод ва таҳқиқоте, ки перомуни осори ӯ анҷом ёфтаанд, ба намоиш гузошта шуданд. Бахши мутолиаи дастаҷамъӣ бо хонандагон дар фазои гарму самимӣ сурат гирифт, ки дар он порчаҳое аз осори Айнӣ хонда ва муҳокима шуданд. Чорабинӣ бо суханони арзишманд дар васфи устод ва бо нияти идома бахшидани чунин иқдомҳои маърифатӣ ба анҷом расид.

9 апрел, дар доираи Фестивали ҷумҳуриявии "Ҳафтаи китоби кӯдакону наврасони Тоҷикистон", дар Гимназияи давлатии №1-и ноҳияи Ҷалолиддини Балхӣ чорабинии фарҳангии бошукӯҳ баргузор гардид. Ин чорабинӣ бо мақсади баланд бардоштани маърифати китобдӯстӣ ва тарғиби фарҳанги мутолиа дар байни кӯдакону наврасон таҳти унвони "Китоб - беҳтарин дӯсти мо" роҳандозӣ шуд.

 Дар ин ҳамоиш намояндагони Китобхонаи марказии ноҳия ва Китобхонаи бачагона фаъолона иштирок намуданд. Ба ифтихори ин ҳафта намоиши махсуси китобҳо таҳти унвонҳои "Марҳабо, фестивали китоб" ва "Ҳафтаи адабиёти кӯдакон ва наврасон" баргузор гардида, даҳҳо асари адабӣ, китобҳои афсонаву достонҳои кӯдакона ва таълифоти муаллифони маъруфи тоҷик ба маърази тамошо гузошта шуданд.

Чорабинӣ бо суханрониҳо ва баромадҳои тарбиявӣ ғанӣ гардонида шуд, ки дар онҳо аҳамияти китоб ва нақши он дар тарбияи шахсияти кӯдак мавриди баррасӣ қарор гирифт. Иштирокчиён - хонандагон, омӯзгорон ва меҳмонон таъкид доштанд, ки китоб на танҳо воситаи донишомӯзӣ, балки як дӯсти беғараз ва мураббии беҳамто барои ҳар фарди ҷомеа мебошад. Қисмати ҷолиби барнома суҳбат дар мавзуи "Биё, бо ҳам бихонем" буд, ки бо иштироки фаъоли хонандагон баргузор гардид.

Ин бахш ба муносибати эълон шудани соли 2025 ҳамчун "Соли фарҳанги китобхонӣ" дар Тоҷикистон роҳандозӣ шуд. Хонандагон таассуроти худро аз китобҳои дӯстдоштаашон баён намуда, дар бораи нақши мутолиа дар ҳаёти шахсӣ ва омӯзиш изҳори назар карданд. Мақсад аз баргузории чунин чорабиниҳо тарғиби мутолиа, афзоиши ҳисси зебоӣ, баланд бардоштани маърифати хонандагон ва ташаккули шахсияти фарҳангӣ дар миёни насли наврас арзёбӣ мешавад.

    3-юми марти соли ҷорӣ дар толори шуъбаи маорифи ноҳияи Ҷалолиддини  Балхӣ даври озмуни   ноҳиявии санҷишҳои имтиҳонии дохилшавӣ тариқи квотаи Президенти Ҷумҳурии Тоҷикистон баргузор гардид. Дар ин рӯз аъзои комиссияи квотаи Президентӣ аз тарафи Мақомоти иҷроияи  ҳокимияти   давлатии   вилояти  Хатлон  ва ноҳияи Ҷалолиддини Балхӣ иштирок намуданд. Тибқи  иттилои шуъбаи маорифи ноҳия дар озмун  хонандагони муассисаҳои    ҳудуди    ноҳия ҷиҳати дарёфти  роҳхат ба  даври  ниҳоӣ  100  нафар  хатмкунандагон   роҳхат   гирифта, ширкат варзиданд. Соли ҷорӣ шумораи квотаи  Президентӣ  барои  ноҳияи  Ҷалолиддини  Балхӣ  26  нафарро ташкил намуд. Ёдовар   мегардем,   ки ҷиҳати    баланд  бардоштани  савияи  дониши  хонандагон ва ҳавасманд гардонидани ҷавонон дар рӯҳияи илмомӯзиву маърифатпарварӣ Ҳукумати  кишвар таҳти   сарварии Пешвои  муаззами  миллат  муҳтарам Эмомалӣ Раҳмон ба наврасону ҷавонон таваҷҷуҳи  хосса  зоҳир  намуда, бобати дарёфти чеҳраҳои болаёқат имтиёзҳои заруриро фароҳам овардаанд. 

       3 апрели соли 2025, дар Китобхонаи марказии ноҳияи Ҷалолиддини Балхӣ бо ибтикори масъулони соҳаи фарҳанг ва китобдорӣ бахшида ба Фестивали ҷумҳуриявии "Ҳафтаи китоби кӯдакону наврасон" чорабинии фарҳангии бошукӯҳ таҳти унвони "Фурӯғи субҳи доноӣ..." баргузор гардид. Дар ин ҳамоиши муҳим, намояндагони соҳаи китобдорӣ ва фарҳанг, аз ҷумла сармутахассиси китобхонаҳои Раёсати фарҳанги вилояти Хатлон Раҷабзода Саодат, мудири бахши таъбу нашри ҳамин раёсат Назира Розиқова, мушовири Раёсати вилояти Хатлон ва узви Иттифоқи нависандагони Тоҷикистон - шоир Чӯпон Бадалӣ Ванҷӣ, директори Китобхонаи марказӣ Салимзода Наргис, методисти китобхона Лутфинисо Азизова, инчунин намояндагони бахши фарҳанг, мактаби санъати бачагона ва китобдорони филиалҳои китобхонаи ноҳия иштирок ва суханронӣ намуданд. Қисмати аввали чорабинӣ бо тамошои намоиши китобҳо ва дастовардҳои Китобхонаи марказӣ ва Китобхонаи бачагона оғоз шуд. Меҳмонон аз гӯшаи намоишӣ, ки дар он асарҳои нав ва таҳқиқоти илмӣ, инчунин намунаҳои эҷодии хонандагони мактаби санъати бачагона ба маърази тамошо гузошта шуда буданд, дидан намуданд. Дар идомаи барнома, дар толори китобхона чорабинии бошукӯҳ бо иштироки хонандагони фаъоли китобхона, намояндагони муассисаҳои таълимӣ ва кӯдакистонҳо доир гардид. Кӯдакону наврасон бо қироати порчаҳо аз ашъори шоирони классику муосир, иҷрои сурудҳои пурмазмун ва намоиши рақсҳои ҷолиб фазои идонаро рангу ҷило бахшиданд. Зимни суханронии худ, намояндагони Раёсати фарҳанги вилояти Хатлон аҳамияти китобхонӣ ва рушди фарҳанги мутолиаро таъкид намуданд. Онҳо зикр карданд, ки баргузории фестивалҳои китобхонаӣ ҳадафи асосии ҷалби насли наврас ба мутолиаи китобро дорад, ки ин раванд барои ташаккули малакаҳои хониш, баланд бардоштани сатҳи фарҳанги иттилоотӣ ва бедор намудани ҳисси ифтихори миллӣ, ватандӯстӣ ва гиромидошти арзишҳои милливу умумибашарӣ мусоидат менамояд. Иштирокчиёни чорабинӣ инчунин таъкид намуданд, ки бо ташаббуси Пешвои миллат, муҳтарам Эмомалӣ Раҳмон, имрӯз барои насли ҷавон озмунҳо ва иқдомҳои фарҳангӣ роҳандозӣ шудаанд, ки мардумро ба китобхонию худомӯзӣ ва ғанӣ гардондани ҷаҳонбинии худ раҳнамун месозанд. Фестивал ҳамчунин ба ҳифз ва тарғиби мероси ниёгон, муаррифии беҳтарин осори адабиёти классикӣ ва муосири тоҷик, тақвияти ҳамкории байни волидайн ва муассисаҳои таълимӣ дар самти мутолиаи кӯдакону наврасон ва рушди истеъдодҳои наврасон нигаронида шудааст. 

   Таърихи 23 марти соли 2025, дар рӯзи таҷлили ҷашни байналмилалии Наврӯз, дар Ҷамоати деҳоти Навоӣ-и ноҳияи Ҷалолиддини Балхӣ муассисаи таҳсилоти умумии асосии №72 мавриди истифода қарор гирифт. Дар маросими ифтитоҳ намояндаи Ҳукумати Ҷумҳурии Тоҷикистон, намояндаи Раёсати маорифи вилояти Хатлон, роҳбарияти мақомоти иҷроияи ҳокимияти давлатии ноҳия, намояндагони мақомоти ҳифҳи ҳуқуқ, масъулини соҳа дар ноҳия, омӯзгорон, хонандагон ва сокинони маҳаллӣ иштирок намуданд. Муассиса бо мақсади беҳтар кардани шароити таълим барои хонандагони маҳаллӣ сохта шуда, дорои шаш синфхона мебошад. Он барои 280 нафар хонанда дар ду баст пешбинӣ шудааст. Қайд гардид, ки Ҳукумати Ҷумҳурии Тоҷикистон дар доираи сиёсати худ барои рушди соҳаи маориф пайваста кӯшиш намуда, бо бунёди муассисаҳои нави таълимӣ барои беҳтар кардани сифати таълим ва фарогирии бештар шароити мусоид фароҳам меорад. 

   17 марти соли ҷорӣ, дар толори муассисаи таҳсилоти  миёнаи умумии  №10-и ноҳияи  Ҷалолиддини Балхӣ бо иштироки муовини  раиси ноҳия оид ба соҳаи иҷтимоӣ Шукурзода Шаҳло вохӯрӣ баргузор гардид. Мавзӯи асосии ин мулоқот таҳкими дӯстӣ ва ҳа мкории  дуҷонибаи Тоҷикистону Қирғизистон буд.

   Дар вохӯрӣ роҳбарони муассисаҳои таълимӣ, омӯзгорон ва сокинони шаҳрак иштирок намуда, оид ба муҳимияти субот ва ҳамзистии осоишта миёни ду халқи ҳамсоя ибрози назар карданд.

   Шукурзода Шаҳло зимни суханронии худ таъкид намуд, ки муносибатҳои неки ҳамсоягӣ ва ҳамкорӣ дар соҳаҳои гуногун барои рушди минбаъдаи ҳарду кишвар аҳамияти калон доранд.

   Инчунин, муовини раиси ноҳия оид ба арзишҳои фарҳангии муштарак, таърихи дӯстии деринаи халқҳои тоҷику қирғиз ва зарурати тақвияти робитаҳои илмӣ, таълимӣ ва фарҳангӣ миёни ҷавонон мубодилаи афкор намуд.

   Таҳти чунин унвон бахшида ба “Рӯзи Модар” 5-уми  марти  соли  равон дар  толори  Китобхонаи  марказии  ноҳияи  Ҷалолиддини  Балхӣ чорабинии тантанавӣ баргузор гардид. Дар чорабинӣ муовини раиси ноҳия Шукурзода  Шаҳло, мудири  бахши  фарҳанг  Латифзода  Насиба, сармутахассиси бахши кор бо занон ва оилаи мақомоти иҷроияи ҳокимияти давлатии ноҳия Ҷавоҳир Риоева, мудири бахши кор бо ҷавонон ва варзиши ноҳия Исматзода Саидшоҳ, директори китобхонаи  марказӣ  Салимзода  Наргис,  методисти  китобхона  Азизова  Лутфинисо  ва хонандагони муассисаҳои таълимии ноҳия ширкат варзиданд.

   Дар маҷлисгоҳи муассисаи таҳсилоти миёнаи умумии № 9-и ноҳияи Ҷалолиддини Балхӣ вохӯрии адиби ҷавони ноҳия - ғолиби озмуни ҷумҳуриявии “Фурӯғи субҳи доноӣ китоб аст” Кароматулло Садиров бо хонандагон доир гардид.Дар вохӯрӣ намояндаи шуъбаи маорифи ноҳия Бароталӣ Ғафуров, омӯзгорон ва хонандагони фаъол, ки аз ашъори  шоир шеърҳо аз бар намуда буданд, иштирок доштанд.  Дар оғоз директори муассиса Нуралӣ Давлатов суханронӣ намуда, қайд дошт, ки бо роҳандозӣ гардидани соли 2025 ҳамчун “Соли фарҳанги китобхонӣ” аз ҷониби раиси вилояти Хатлон, тасмим гирифтем, ки баҳри дар амал татбиқ намудани ин иқдом ва баланд бардоштани завқи хонандагон ба китоб, аз ҷумла шеъру шоирӣ чунин вохӯриҳоро ташкил ва баргузор намоем. Сипас, хонандагон бо завқи баланди бадеӣ шеърхонӣ намуда, бо адиб дар бораи шеъру шоирӣ ва кору зиндагии ӯ суолҳо пешниҳод намуда, ҷавобҳои қаноатбахш гирифтанд. Диққати ҳамаи шоигирдонро ҷоизаи ин шоири ҷавон, ки аз Озмуни ҷумҳуриявии “Фурӯғи субҳи доноӣ китоб аст” ба даст оварда буд,  ба худ ҷалб мекард. Кароматулло Садиров аз заҳмату талошҳои худ ёдовар гардида, хонандагонро ба китобу китобхонӣ,  рӯ овардан ба омӯзиш ва аз бар намудани осори адибони классику муосир ҷалб намуда, ҳамзамон аз иқдомҳои наҷиби Пешвои муаззами миллат муҳтарам Эмомалӣ Раҳмон доир ба таъсиси озмунҳои ҷумҳуриявӣ ба хонандагон машваратҳо дода, инчунин онҳоро барои иштирок намудан дар озмунҳои гуногуни илмию зеҳнӣ роҳнамоӣ кард.