РӮЗИ СОХТМОНЧИЁН - ҶАШНИ СОЗАНДАГОНИ ВАТАН

                                           РӮЗИ СОХТМОНЧИЁН - ҶАШНИ СОЗАНДАГОНИ ВАТАН

                Ҳамкасбони азиз, сохтмончиёни бомаҳорат, меъморони ҳунарманд ва собиқадорони соҳаи пурифтихори сохтмону меъморӣ! Бо эҳтироми бузург ва самимияти комил ҳамаи шумо - онҳое, ки бо маҳорату масъулият биноҳои баланду зебо месозед, ба кӯчаю маҳаллаҳои кишварамон ҳусни тоза мебахшед, симои шаҳрҳо ва деҳоти Тоҷикистонро дилкаш мегардонед ва бо офаридаҳои худ зиндагии мардумро гуворотар месозед, ба муносибати Рӯзи кормандони сохтмон сидқан табрик мегӯям. Имрӯз Тоҷикистон дар марҳилаи рушду созандагии бесобиқа қарор дорад.

 Дар тамоми гӯшаҳои кишвар корҳои бунёдкорӣ бо шиддат идома доранд. Бо заҳмати шабонарӯзии сохтмончиёни ватанӣ дар даҳсолаи охир садҳо иншооти истиқоматӣ, муассисаҳои маориф, марказҳои тиббӣ, шабакаҳои хизматрасонӣ, боғҳои фарҳангу фароғатӣ ва роҳҳои нави автомобилгард сохта ё аз нав таъмиру бозсозӣ шудаанд. Ин ҳама на танҳо симои кишварро тағйир додаанд, балки иқтидори иқтисодӣ ва иҷтимоии Ватанамонро ба сатҳи нав бардоштаанд.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон борҳо таъкид кардаанд: «Мо бояд ба хотири пешрафти давлати соҳибистиқлоламон ва Ватани аҷдодиамон - Тоҷикистони озоду маҳбуб, минбаъд низ бо ҳамдилӣ ва муттаҳидона заҳмат кашем, то ки наслҳои оянда аз мероси ободу созандаи мо ифтихор намоянд». Дастони пурэъҷозу заҳматкаши сохтмончиён ба Ватан биноҳое эҳдо мекунанд, ки на барои як насл, балки барои садсолаҳо боқӣ мемонанд. Шаҳрҳои зебо, маҳаллаҳои обод, муассисаҳои таълимӣ, донишгоҳҳо, беморхонаҳо, қасрҳои фарҳанг, варзишгоҳҳо, хонаҳои замонавӣ, меҳмонхонаҳо ва садҳо иншооти дигар, ҳама нишонаи заҳмати пурифтихори шумо мебошанд.

Ин ҳама шаҳодат медиҳад, ки нуфузу эътибори касби сохтмончӣ сол то сол меафзояд. Пешвои муаззами миллат муҳтарам Эмомалӣ Раҳмон ба дурустӣ гуфтаанд: «Сохтмончиён пайвандгари асрҳо ва наслҳоянд». Воқеан, бо заҳмати шумо наслҳои имрӯз ва фардо бо мероси ободу зебо рӯ ба рӯ мешаванд. Аз номи худ ва ҳамкорон ба ҳамаи онҳое, ки бо меҳнати содиқона дар бунёд ва азнавсозии кишвар саҳмгузоранд, изҳори сипоси самимӣ менамоям. Ҷашн муборак бод, эҷодкорон ва созандагони Ватан! Шукуров Саид, мутахассиси пешбари бахши сохтмон ва меъмории мақомоти иҷроияи ҳокимияти давлатии ноҳияи Ҷалолиддини Балхӣ