"ПАХТА - МАНБАИ РУШДИ САНОАТ ВА ИҚТИСОДИ МАҲАЛЛӢ"

                                    "ПАХТА - МАНБАИ РУШДИ САНОАТ ВА ИҚТИСОДИ МАҲАЛЛӢ"

         Таҳти ҳамин унвон, 12 августи соли 2025 дар толори хурди мақомоти иҷроияи ҳокимияти давлатии ноҳияи Ҷалолиддини Балхӣ ҷаласаи корӣ бахшида ба омодагӣ барои оғози мавсими чиниши пахта баргузор гардид. Ҷаласа таҳти раёсати муовини якуми раиси вилояти Хатлон Мирзозода Музаффар Бурҳон сурат гирифт ва дар кори он раиси ноҳияи Ҷалолиддини Балхӣ Холиқзода Рустам Ҳикматулло, масъулони соҳаи кишоварзӣ, роҳбарони ҷамоатҳои шаҳраку деҳот, намояндагони хоҷагиҳои пахтакор ва дигар шахсони масъул ширкат варзиданд.

Ҳадафи вохӯрӣ - баррасии омодагии хоҷагиҳо ба ҷамъоварӣ ва сари вақт ба корхонаҳои коркард супоридани «тиллои сафед» буд. Дар ҷараёни нишаст таъкид шуд, ки пахтакорӣ аз ҷумлаи самтҳои калидии кишоварзӣ маҳсуб меёбад ва нақши он дар рушди саноати ватанӣ хеле бузург аст. Бо зикри аҳамияти иқтисодиву иҷтимоии ин соҳа, суханронон қайд карданд, ки парвариши пахта барои деҳқонон манбаи муҳими даромад ва барои кишвар омили рушди устувори саноат мебошад.

Мирзозода Музаффар Бурҳон ва дигар масъулон зикр намуданд, ки ҳосили имсолаи пахта бояд бо сифати баланд ҷамъоварӣ шуда, бетаъхир ба корхонаҳои коркард расонида шавад. Дар раванди коркард аз пахта беш аз 300 намуди маҳсулоти гуногуни саноатӣ ва хоҷагии халқ истеҳсол мегардад, ки ин боз ҳам зарурати таҳким бахшидани занҷираи истеҳсолу коркарди онро нишон медиҳад. Дар анҷоми ҷаласа ба хоҷагидорон ва роҳбарони ҷамоатҳо дастур дода шуд, ки барои ташкил ва пешбурди босамари мавсими чиниши пахта тадбирҳои заруриро амалӣ намуда, ҳосилро сари вақт ва бо талафоти ҳадди ақал ҷамъоварӣ намоянд.