МО ПАЙРАВОНИ ПЕШВОИ ВАТАНСОЗИ ХУД ҲАСТЕМ

                                             МО ПАЙРАВОНИ ПЕШВОИ ВАТАНСОЗИ ХУД ҲАСТЕМ

         Бузургтарин бахш озод зистан аст. Фарде, ки ватани озоду соҳибистиқлол дорад, хушииқболу сарбаланд аст. Бешак Истиқлолият беҳтарин  дастоварди  охири асри ХХ барои Тоҷикистон  буда, хираду  заковати волои халқи  тоҷик аз он шаҳодат медиҳад. Ҳамин сиришти сулҳпарваронаи халқи  мо буд, бар рағми  душманони  ватани  озодамон, ки ҷанги дохилиро  тарҳрезӣ карда  буданд, миллати тоҷик тавонист ба ваҳдату  ризоияти миллӣ бирасад. Имрӯз ҳар лаҳза  хушбахту  хушиқбол  будани худро ҳис мекунем.

Дар фазои орому  осуда ғамхориҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро  ба ҷон эҳсос  мекунаму  баҳраварем. Ин марди  бузургвор барои ояндаи  мо ҳамаи амалҳои муфиду босамарро меандешад. Аз ҷумла, Квотаи  Президентӣ, баргузор  кардани озмунҳои  ҷумҳуриявии  “Фурӯғи субҳи доноӣ китоб аст”,  “Тоҷикистон-Ватани азизи ман” ва  “Илм фурӯғи маърифат” далели равшани таваҷҷуҳи пайвастаи Сарвари давлат барои ояндаи мост.

Ростӣ, барои ҳамсолони  мо, ки аз вазъи имрӯзи ҷаҳон огоҳанд,  расидан ба  қадри чунин  фазои мусоиди сабзидану  шукуфоӣ қарзи инсониву шаҳрвандист. Зеро мебинем, ки дар  дунё чӣ  мегузарад. Воқеан, имрӯз барои бисёре аз мардуми  сайёра  озодӣ ягона  орзуст. Ободӣ аввалин мақсад аст. Оромиш, осоиш сулҳу ваҳдат беҳтарин  арзишҳоеанд, ки он мардумон ҳамеша аз Кирдугор  металабанд. Мо  хушбахтем, ки ин сарватро дорем. Мо дар кишвари озоду ободи хеш  зери  Парчами  сулҳу ваҳдату  Истиқлолият  ҳама  якҷо  ҳаёти хушбахтона  дорем. Хуш ба ҳоли мо ки  Пешвои  сулҳпарвару сулҳофар  дорем.

Роҳбаре, ки оғози  кораш  Сулҳу ваҳдат буд. Дар маҷмуъ, метавон  бо дили пур  ба ҷаҳон  эълон дошт, ки мо  фарзандони хушбахти  айёми худ ҳастем. Мо пайравони  Пешвои ватансози  худ ҳастем. Мо ҳамеша ҳама якҷо, ҳама бо ҳам  ҳаммақсаду  ҳаммаром бошем, то дар оянда ватандору  ватандӯст, ваҳдатпарасту  ваҳдатсаро бимонем, хушбахтии мо бо ватани азизамон -Тоҷикистони соҳибистиқлол аст.

 Мо дар пайравии Пешвои миллати худ дар ҳифзи Ватан ва ватансозӣ содиқ хоҳем монд. Нозанин Мазориева, гирандаи Стипендияи президентӣ - хонандаи синфи 10, МТМУ №10-и ноҳияи Ҷалолиддини Балхӣ