ТАНТАНАИ ВАҲДАТУ ХУДШИНОСӢ: БАРГУЗОРИИ ЧОРАБИНИИ "ШУКӮҲИ ИСТИҚЛОЛ"

                       ТАНТАНАИ ВАҲДАТУ ХУДШИНОСӢ: БАРГУЗОРИИ ЧОРАБИНИИ "ШУКӮҲИ ИСТИҚЛОЛ"

         Имрӯз, 25 августи соли ҷорӣ дар Боғи фарҳангу фароғатии ноҳияи Ҷалолиддини Балхӣ чорабинии бошукӯҳи фарҳангиву маърифатӣ таҳти унвони «Шукӯҳи Истиқлол» баргузор гардид. Ин ҳамоиши идона бо ташаббуси Корхонаҳои фаръии давлатии «Хоҷагии манзилию коммуналӣ», «Обтаъминкунӣ ва корезӣ» ва «Обдеҳоти ноҳия» роҳандозӣ шуда, ба истиқболи ҷашни 34-умин солгарди Истиқлолияти давлатии Ҷумҳурии Тоҷикистон бахшида шуд. Дар ин тантанаи ифтихорӣ раиси ноҳия Холиқзода Рустам Ҳикматулло, роҳбарони ташкилоту муассисаҳо, намояндагони соҳаҳои гуногуни хоҷагии халқ, фаъолон ва садҳо нафар сокинони шарафманди ноҳия ширкат варзиданд.

Барномаи фарҳангӣ бо сурудҳои ватандӯстонаи ҳунармандони шинохта Баҳодур Ҷураев ва Шаҳло Давлатова, инчунин бо баромади ҳаҷвнигори маъруф Сайдаҳмад Холов хотирмон гардид. Иштирокчиён бо сурудҳои ифтихор аз Ватан, ваҳдату ягонагӣ ва дастовардҳои даврони Истиқлол руҳбаланд гардиданд. Истиқлолияти давлатӣ, ки аз муҳимтарин дастовардҳои миллат ба шумор меравад, барои мардуми тоҷик манбаи саодат, сарчашмаи ваҳдат ва кафили рушду пешрафти давлатдории миллӣ мебошад.

Ба туфайли сиёсати хирадмандонаи Пешвои муаззами миллат муҳтарам Эмомалӣ Раҳмон, имрӯз Тоҷикистон дар арсаи ҷаҳонӣ чун давлати озоду мустақил ва дорои ояндаи дурахшон шинохта мешавад. Чорабинии «Шукӯҳи Истиқлол» бори дигар эҳсоси худшиносиву худогоҳӣ ва ифтихори миллии сокинони ноҳияи Ҷалолиддини Балхиро боло бурда, саҳнаи бузурге гардид барои арҷгузорӣ ба дастовардҳои Истиқлолият ва муаррифии руҳияи созандагию ватандӯстӣ.