ШОМИ ПУРШУКӮҲИ "ШУКӮҲИ ИСТИҚЛОЛ"

                                                   ШОМИ ПУРШУКӮҲИ "ШУКӮҲИ ИСТИҚЛОЛ"

         Шоми 28 августи соли 2025, дар Боғи фарҳангу фароғатии ноҳияи Ҷалолиддини Балхӣ чорабинии тантанавӣ таҳти унвони «Шукӯҳи Истиқлол» бо ҳузури васеи сокинон ва меҳмонон баргузор шуд. Ин барномаи фарҳангиро Комиссарияти ҳарбии ноҳия ба ифтихори ҷашни бузурги миллӣ - Истиқлолияти давлатии Ҷумҳурии Тоҷикистон ташкил намуд. Дар маросим раиси ноҳияи Ҷалолиддини Балхӣ Холиқзода Рустам Ҳикматулло, роҳбарони ташкилоту муассисаҳо, кормандони сохторҳои давлатӣ, аҳли зиё ва сокинони сершумори ноҳия ширкат варзиданд.

 Иштироки густурдаи мардум шаҳодати он буд, ки Истиқлолияти давлатӣ барои ҳар фарди ватандӯст рамзи шарафу ифтихор ва такягоҳи устувори ҳаёти озоду орому осуда мебошад. Қайд гардид, ки маҳз ба шарофати Истиқлол миллати тоҷик соҳиби давлати соҳибихтиёр гардида, имрӯзу фардои дурахшонро бо дастовардҳои беназир ва ормонҳои созанда пешвоз мегирад.

Шоми идона бо баромади ҳунарманди маъруф идома ёфт. Ҳузури сарояндаи маҳбуби кишвар Нозияи Кароматулло, ки бо садои дилнишин ва ҳунари нотакрораш қалби ҳазорон мухлисро тасхир кардааст, ба чорабинӣ ранги тоза бахшид. Сурудҳои ватандӯстона ва ифтихормандонаи ӯ фазои шодию сурур ва руҳбаландиро дар байни ҳозирин афзун намуданд. Чорабинии «Шукӯҳи Истиқлол» ба маънои ҳақиқӣ таҷассуми ваҳдату ҳамбастагии мардум буд. Сокинон бо рӯҳияи ифтихор аз давлати соҳибистиқлол самимона ва якҷо шодиву хурсандиашонро баён доштанд. Бо баргузории чунин маҳфилҳои тантанавӣ, на танҳо арзишҳои Истиқлолият пос дошта мешаванд, балки насли ҷавон низ ба маърифати ватандӯстӣ, худшиносӣ ва ифтихори миллӣ ҳидоят мегарданд.