МУДОФИА - ЯКЕ АЗ ВАЗИФАҲОИ МУҲИМТАРИНИ ДАВЛАТ

   Тибқи дастуру супоришҳои роҳбарияти Ҳукумати Ҷумҳурии Тоҷикистон баҳри омӯзиши ҳолати омодабошии қувва ва захираҳои сафарбарӣ имрўз, 15 апрел дар Варзишгоҳи марказии «Панҷшер»-и ноҳияи Ҷалолиддини Балхӣ санҷишу омӯзиши қувва ва воситаҳои қисми мудофиаи ҳудудӣ ва захираҳои сафарбарӣ доир гардид. Дар ин тадбир беш аз 3000 шаҳрвандони дар эҳтиёт қарордошта бо дарки масъулияти баланди ватандорӣ ширкат варзида, омодагии худро барои ҳифзи хоки муқаддаси Ватан бо ин амал бори дигар исбот намуданд. Чуноне мушоҳида карда шуд барои дар сатҳи баланд ташкил ва гузаронидани ин чорабинӣ тамоми шароиту имконият фароҳам оварда шуда, гурӯҳи табибон, нақлиёти ёрии таъҷилӣ, хадамоти оташнишонӣ ва дигар техникаву воситаҳо дар ҳолати хуби омодабош қарор доштанд. 

   Даҳҳо нафар кормандони ташкилоту муассисаҳо, сокинон, техникаву нақлиёти гуногуни хизматрасонӣ ба намоиш гузошта шуда, собитгари он буд, ки мардони шуҷои меҳандӯсти ноҳия ҳамеша омодаанд, ки амнияту суботи кишварро бо дарки баланди масъулият аз ватану ватандорӣ ҳимоя созанд. Дар ин чорабинӣ намояндаи Вазорати мудофиаи Ҷумҳурии Тоҷикистон - палковник Қурбонзода Абдурашид, раиси ноҳия Холиқзода Рустам Ҳикматулло ва масъулини тамоми сохторҳои ноҳия ширкат доштанд. Зимни суханрониаш раиси ноҳия Холиқзода Рустам Ҳикматулло атрофи ҳолати омодабошӣ ва дигар паҳлӯҳои ташкили чунин як ҳамоишро шарҳ дода, иброз дошт, ки зери мафҳуми мудофиа системаи тадбирҳои сиёсӣ, иқтисодӣ, иҷтимоӣ, ҳарбӣ, ҳуқуқӣ, экологӣ ва ғайра фаҳмида мешавад, ки ба таъмини мустақилият, якпорчагӣ ва дахлнопазирии ҳудуди ҷумҳурӣ, ҳимояи манфиатҳои давлат ва ҳаёти осоиштаи аҳолӣ равона карда шудааст.  

   Мудофиа яке аз вазифаҳои муҳимтарини давлат буда, кори тамоми халқ ба ҳисоб меравад. Мудофиа бо омодагии доимии Қувваҳои Мусаллаҳ, иқтисодиёт, ҳудуд ва аҳолии ҷумҳурӣ барои пешгирии таҳдиди ҳар гуна амалу хатарҳо пешбинӣ гардидааст. Дар идома ҳайати намояндагии Вазорати мудофиаи Ҷумҳурии Тоҷикистон ва роҳбарияти ноҳия аз намоиши техникаҳо боздид намуда, дар як маврид бо иштирокчиёни машқи омодабошии қувва ва захираҳои сафарбарӣ суҳбат оростанд. Дар чорабинӣ масъулин оид ба аҳамият ва муҳиммияти ташкил ва гузаронидани санҷиши ҳолати омодабошии қувва ва захираҳои сафарбарӣ андешаронӣ намуда, қайд доштанд, ки баргузории чорабинӣ, новобаста аз вазъи сиёсӣ, иқтисодиву иҷтимоӣ дар ҳолати омодабош будани шаҳрвандон ҳангоми мудофиаи ҳудудӣ арзёбӣ гашта, иштироки фаъолонаи сокинони касбу кори гуногун дар ин чорабинӣ, исботи он аст, ки мардони шуҷои ватан бо руҳияи шикастнопазир зери сиёсати муваффақонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи кишвар, муҳтарам Эмомалӣ Раҳмон баҳри ҳифзи арзишҳои миллӣ, марзи кишвар, муқаддасоти миллӣ, таъмини амнияту суботи ҷомеаи соҳибистиқлоли Тоҷикистон содиқонаву садоқатмандона омодаанд. Ҳифзи Ватан, ҳимояи арзишҳои олии ватандорӣ аз ҳар фарди дилогоҳу хештаншинос рисолати бузурги фарзандиву садоқатмандиро тақозо менамояд.

                                        БАРГУЗОРИИ «РӮЗИ МУДОФИАИ ГРАЖДАНӢ»

     Бо мақсади омӯзиши ҳайати омӯзгорон ва хонандагон оид ба мудофиаи гражданӣ санаи 15 апрели соли 2024 дар муассисаи таҳсилоти миёнаи умумии №1-и ноҳияи Ҷалолиддини Балхӣ чорабиниҳои таълимӣ гузаронида шуд. Дар чорабинӣ намояндагони бахши ҳолатҳои фавқулода дар ноҳия ва шуъбаи маориф иштирок доштанд. Чорабинии мазкур бо мақсади эътино, пешгирӣ ва рафъи оқибатҳои ҳолатҳои фавқулода, баланд бардоштани сатҳи омодагии ҳайати омӯзгорону хонандагон ҳангоми сар задани онҳо баргузор карда шуд. Ҳамзамон дар ин рӯз дарсҳои кушод доир ба мавзӯъҳои ҳолатҳои фавқулода ва мудофиаи гражданӣ, ёрии аввалияи тиббӣ ҳангоми рух додан, усулҳои муҳофизати ҳайъат ва ҳангоми ҳолатҳои фавқулода ташкил карда шуданд. Тибқи сенария чорабинии таълимӣ бо садо додани бонги хатар хонандагон ва омӯзгорон ба ҷойҳои бехавфи саҳни муассиса баромаданд. Гурӯҳҳои наҷот тибқи дастурамал чорабиниҳои лозима, аз ҷумла хабардорсозӣ, наҷот додани зарардидагон, расонидани ёрии аввалияи тиббӣ ба зарардидагон, хомӯш намудани сӯхтор ва дигар ҳолатҳои ба вуқӯъ омадаро ба анҷом расониданд. Дар рафти тамринҳо гурӯҳҳои ёрирасон аз иҷрои вазифаҳои дар наздашон гузошташуда ба хубӣ баромаданд. Дар ҷамъбасти чорабинӣ иштирокчиёни фаъол аз тарафи бахши ҳолатҳои фавқулода ва шуъбаи маорифи ноҳия бо Ифтихорнома сарфароз гардонида шуданд.

СОЛИ 2024 - ҲАМЧУН «СОЛИ МАЪРИФАТИ ҲУҚУҚӢ»

          Бо мақсади иҷрои нақша-чорабиниҳои муштараки сохторҳои дахлдори вилояти Хатлон аз 20 марти соли ҷорӣ дар самти баланд бардоштани маърифати ҳуқуқии шаҳрвандон, таъмини волояти қонун ва дастрасӣ ба адолат, оид ба шарҳу тавзеҳи Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон санаи 5 апрели соли 2024 дар толори калони мақомоти иҷроияи ҳокимияти давлатии ноҳияи Ҷалолиддини Балхӣ вохӯрӣ баргузор гардид. Дар вохӯрӣ муовини раиси ноҳия оид ба соҳаи идеологӣ Қурбонзода Қурбоналӣ, намояндаи Суди вилояти Хатлон Мирзозода Неъмат, намояндаи прокуратураи вилояти Хатлон Самизода Суҳроб, намояндаи Раёсати Вазорати корҳои дохилии Ҷумҳурии Тоҷикистон дар вилояти Хатлон Обидзода Юсуф, намояндаи Раёсати Агентии назорати давлатии молиявӣ ва мубориза бо коррупсия дар вилояти Хатлон Қурбонзода Манучеҳр, намояндаи Раёсати адлия дар вилояти Хатлон Эшпулотов Бахтиёр ва намояндаи шуъбаи дин, танзим, анъана ва ҷашну маросими вилояти Хатлон Сафаров Умар иштирок намуданд. Баромадкунандагон доир ба эълон гардидани Соли маърифати ҳуқуқӣ ва шарҳу тавзеҳоти Паёми Пешвои муаззами миллат суханронӣ намуда, қайд карданд, ки фармони Президенти Ҷумҳурии Тоҷикистон “Дар бораи соли маърифати ҳуқуқӣ” эълон намудани соли 2024 аз 30 декабри соли 2023 №668 ба имзо расид. Мақсад аз ба тасвиб расидани фармони мазкур, баланд бардоштани сатҳи маърифати ҳуқуқии шаҳрвандон, тарғиби арзишҳои демократӣ, мустаҳкам намудани институти ҳуқуқи инсон, муносибати эҳтиромона бо он, баланд бардоштани мақоми қонун, тарбияи шаҳрвандон дар рӯҳияи эҳтиром нисбат ба он ва таъмин намудани волояти қонун, ташаккул додани низоми устувори рафтори ҳуқуқӣ, оштинопазирӣ нисбат ба ҳама гуна ҳуқуқвайронкунӣ ва ногузир будани масъулияти ҳуқуқӣ ва ташкил намудани механизми самараноки ҳамкории давлат ва ниҳодҳои ҷомеаи шаҳрвандӣ дар самти маърифати ҳуқуқии шаҳрвандон мебошад.

 ДАВРИ НОҲИЯВИИ ОЗМУНИ ҶУМҲУРИЯВИИ «ТОҶИКИСТОН-ВАТАНИ АЗИЗИ МАН»

   Дар Қасри фарҳанги ба номи Ҷалолиддини Балхӣ бо иштироки намояндаи мақомоти иҷроияи ҳокимияти давлатии ноҳия Раҷабалӣ Абдулов ва ҳайати ҳакамон рӯзи 5 апрели соли 2024 даври ноҳиявии озмуни ҷумҳуриявии «Тоҷикистон - Ватани азизи ман» баргузор гардид. Озмун аз рӯи ду номинатсия-сарояндагӣ ва навозандагӣ баргузор гардид, ки дар он иштирокчиёни аз 12 то 17- сола ва аз 18 то 35 - сола иштирок намуданда, аз 25 нафар довталабони иштирокчӣ 24 нафарашон ба даври вилоятӣ роҳхат гирифтанд. Озмун бо мақсади дарёфти истеъдодҳои нави соҳаи санъат, баланд бардоштани мақому маҳорати касбӣ, тақвият бахшидан ба касбияти баланди ҳунари иҷрокунандагӣ ва эҷоди мусиқии нав, инчунин таъмини ашъори баландғояи ватандӯстона, дарёфти беҳтарин намунаҳои оҳанг ва сурудҳои тараннумгари дастовардҳои замони Истиқлолияти давлатӣ, саҳми Президенти Ҷумҳурии Тоҷикистон муҳтарам Эмомалӣ Раҳмон дар эъмори давлатдории навини тоҷикон ва тарғибу ташвиқи анъанаҳои арзишманди миллию мероси пурғановати ниёгон роҳандозӣ шуда, шаш сол боз идома дорад.  

ФЕСТИВАЛИ ҶУМҲУРИЯВИИ «ҲАФТАИ КИТОБИ КӮДАКОНУ НАВРАСОН» ДАР НОҲИЯИ ҶАЛОЛИДДИНИ БАЛХӢ

   Ҳамасола аз 2 то 9 апрел дар саросари мамлакат Фестивали ҷумҳуриявии «Ҳафтаи китоби кӯдакону наврасони Тоҷикистон» баргузор мегардад. Фестивали мазкур рӯзи 3 апрели соли 2024 бо иштироки муовини раиси ноҳия оид ба соҳаи идеологӣ Қурбонзода Қурбоналӣ, адиб ва сармуҳаррири рӯзномаи ноҳиявии «Навиди Балх» Одиназода Ибодуллоҳ, мутахассиси пешбари бахши фарҳанг Гулмурод Кабиров, директори китобхонаи марказӣ Наргис Салимова, директори Осорхонаи таъриху кишваршиносӣ Шаҳзода Ибрагимҷонова, сармутахассиси бахши кор бо ҷавонон ва варзиши ноҳия Хайриниссо Қаҳорова ва китобдорони филиалҳо дар китобхонаи марказии ноҳияи Ҷалолиддини Балхӣ баргузор карда шуд. 

                                 1 АПРЕЛ - ОҒОЗИ ДАЪВАТИ БАҲОРӢ!

    Тавре маълум аст, ҳамасола дар саросари кишварамон -Тоҷикистони азиз шурӯъ аз 1 апрел мавсими даъвати баҳорӣ ба хизмати ҳарбӣ оғоз мегардад. Бо ин мақсад, дар рӯзи аввали мавсими даъвати баҳорӣ аз маркази ноҳияи Ҷалолиддини Балхӣ ҷавонони даъватшуда дар даст шиор ва Парчами миллӣ то назди Маҷмааи варзишии Исмоили Сомонӣ роҳпаймоӣ намуданд. Дар оғози ҳамоиш раиси ноҳия Холиқзода Рустам Ҳикматулло ба сохторҳои марбутаи давлатӣ, комиссияҳои даъватӣ, мақомоти ҳифзи ҳуқуқ ва волидоне, ки фарзандонашон довталабона хизмат кардан дар сафи Қувваҳои Мусаллаҳро ихтиёр намуданд, изҳори сипос намуд. Қайд гардид, ки бо талошҳои пайвастаи Асосгузори сулҳу ваҳдати миллӣ - Пешвои миллат, Сарфармондеҳи Олии Қувваҳои Мусаллаҳи Ҷумҳурии Тоҷикистон, муҳтарам Эмомалӣ Раҳмон барои фаъолияти рӯзмарраи хизматчиён дар қисмҳои ҳарбӣ шароити зарурии маишиву моддӣ муҳайё шуда, дар ҳамаи воҳидҳои низомӣ имрӯз афсарони касбии ботаҷриба ҷиҳати баланд бардоштани малакаи ҳарбиву ҷисмонии ҷавонон, тарбияи онҳо дар рӯҳияи ватандӯстӣ, садоқат ба марзу бум фаъолияти босамар менамоянд.

ТАҶЛИЛИ НАВРӮЗИ БАЙНАЛМИЛАЛӢ ДАР НОҲИЯИ ҶАЛОЛИДДИНИ БАЛХӢ

     Бо ташаббуси мақомоти иҷроияи ҳокимияти давлатии ноҳияи Ҷалолиддини Балхӣ ба ифтихори таҷлили сазовори ҷашни Наврӯзи байналмилалӣ дар ҷамоатҳои шаҳраку деҳоти ноҳия як силсила чорабиниҳои бошукӯҳи наврӯзӣ доир гардид. Хиёбону кӯчаҳои ноҳия барои истиқболи шоиста аз ҷашни байналмилалии Наврӯз ба таври идона ороста шуда, ба ин муносибат тамоми кӯчаю хиёбон ва маҳаллаву шаҳрак ҳамаҷониба омодагӣ гирифта буданд. Дар доираи тантанаҳои наврӯзӣ субҳи имрӯз, 23 март бо иштироки раиси ноҳия Холиқзода Рустам Ҳикматулло, масъулини ҷамоатҳои шаҳраку деҳот ва сокинони ноҳия дар базмгоҳҳои наврӯзӣ бо баргузории чорабиниҳои фарҳангӣ - фароғатӣ оғози Соли нави аҷдодӣ - Наврӯзи оламафрӯзро бо назардошти расму русуми мардумӣ бо шукӯҳу шаҳомати хоса таҷлил карданд. Сараввал раиси ноҳия Холиқзода Рустам Ҳикматулло ҳамагонро бахшида ба ҷашни байналмилалии Наврӯз табрик гуфта, чунин қайд намуд: “Мақсади асосии таҷлили бошукӯҳу ҳадафманди Наврӯз таҷассуми гиромидошти муқаддасот, суннату анъана ва фарҳангу тамаддуни қадими миллати тоҷик буда, марҳилаҳои ташаккули таърихии он ба ҳайси сармояи маънавии миллати тоҷик ва ҷашни эҳёи табиату оғози соли нав, шодиву сурури ҳамагонӣ, бузургдошти дӯстию бародарӣ ва ваҳдату якпорчагӣ, суннату оинҳои мардумӣ, орзую ормонҳои умумихалқӣ ва арзишҳои дунявӣ дар ҳамоҳангӣ бо рисолати шодиофаринии Наврӯз маҳсуб меёбад”. -Имрӯз, ки фасли баҳор ва шукӯҳу нусрати Наврӯзи некпай дар саросари кишвар, аз ҷумла дар ноҳияи Ҷалолиддини Балхӣ танинандоз аст, бояд лаҳзае фаромӯш накунем, ки мавсими кишту кор ва талошҳои созандагию бунёдкорӣ дар пешанд. 

                                              ШАНБЕГИИ ДАСТАҶАМЪОНА

   Санаи 23 декабр дар асоси дастуру супоришҳои раиси вилояти Хатлон муҳтарам Давлаталӣ Саид дар шаҳру навоҳии вилоят аз ҷумла, дар ноҳияи Ҷалолиддини Балхӣ шанбегӣ эълон карда шуд. Дар ин рӯз кормандони ташкилоту муассисаҳо, сокинони маҳалла, маориф, соҳаи тандурустӣ ва хонандагону омӯзгорон мунтазам ба шанбегӣ ва корҳои ободонӣ машғул гардиданд. Кормандони соҳаҳои зикршуда ба тозаву озода намудани саҳни биноҳо, гулгашту хиёбонҳо ва сарзабзу хуррам намудани он баромаданд. Дар ин рӯз аз ҷониби онҳо гирду атрофи дарахтон аз ҳар гуна алафҳои бегона тоза ва нарм карда шуда, ҳамзамон гулҳои зебои гуногуни мавсимӣ дар саҳни корхона ва роҳравҳо шинонида шуд. Албатта, тоза нигоҳ доштани муҳити атроф ва назди муассисаву ташкилоту хонаи истиқоматӣ аз маданияти баланди кормандону истиқоматкунандагонаш шаҳодат медиҳад.

ҲУНАРОМӮЗӢ - ГАРАВИ КОМЁБИҲО

        Ҳунар гиреҳкушои тамоми мушкилоти инсон ба ҳисоб меравад. Бузургони мо ҳамеша ситоиши ҳунар мекарданд ва онро беҳтарин омили инсонӣ фармудаанд. Ин аст, ки дар мактаб-интернати ҷумҳуриявии кӯдакони ятими ноҳияи Ҷалолиддини Балхӣ барои омӯхтани ҳунари пазандагию дӯзандагӣ барои хонандагон шароитҳои муфид муҳайё карда шудааст. Инчунин хонандагон бо маҳсулотҳои пухтупазкардаи худ, аз ҷумла навъҳои гуногуни қаннодӣ ва ҳунарҳои куртадӯзӣ, тоқидӯзӣ ва гулдӯзӣ дар маҳфилҳо ва озмунҳо ширкат меварзанд. Тибқи иттиллои роҳбари маҳфил Наргис Шарипова дар ин маҳфил 12 нафар духтарон ба дӯзандагӣ ва 14 нафар духтарон ба пухтупаз машғул мебошанд. «Мувофиқи талабот ва пешниҳодҳои Ҳукумати Ҷумҳурии Тоҷикистон ва дастуру супоришҳои Пешвои муаззами миллат, муҳтарам Эмомалӣ Раҳмон дар зиндагӣ интихоби касб яке аз масъалаҳои муҳим аст. Алалхусус, бо соҳиб шудани касб шахс дар оянда соҳиби ҷойи кор ва музди меҳнати хуб шуда, худ ва азизонашро бо ризқу рӯзии дарёфткарда таъмин менамояд. Интихоби касби мувофиқ имконият медиҳад, ки ҳар яки мо соҳиби ҷойи кор гардида, аз ӯҳдаи бобарори иҷроиши вазифаи ба зиммадошта баромада ба пешравиҳо ноил гардем», -қайд намуд Наргис Шарипова. Ҳадафи муассисаи таълимии мазкур аз он иборат аст, ки ҷалби духтарон ба омӯзиши касбу ҳунар, аз ҷумла дар доираи ҳунарҳои волои мардумӣ, рушди қобилияту истеъдоди хонандагон баланд бардошта мешавад ва барои таъмини минбаъдаи зиндагии хеш як заминаи боэътимод мегардад. Яъне, ҳунаромӯзӣ - гарави комёбиҳои ҳаёт хоҳад гашт. 

ДАСТОВАРДҲО ВА ФАЪОЛИЯТИ МАКТАБИ ВАРЗИШИИ НОҲИЯИ ҶАЛОЛИДДИНИ БАЛХӢ.

     Варзиш яке аз самтҳои афзалиятноки сиёсати иҷтимоии давлату ҳукумат ба ҳисоб рафта, нақш ва ҷойгоҳи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди тарбияи ҷисмонӣ ва варзиш, ки ҳамчун ифодакунандаи сиёсати мантиқии давлату ҳукумат ба таҳкими ҳаёти иҷтимоии ҷомеа, солимии миллат, ташвиқу таблиғи тарзи ҳаёти солим, таҳкими дӯстӣ ва тарғиби идеяи миллати солим мавқеи баландро соҳиб гардидааст. Вобаста ба гуфтаҳои боло дар Муассисаи давлатии мактаби варзишии ноҳияи Ҷалолиддини Балхӣ имрӯзҳо 20 нафар мураббӣ кор ва фаъолият менамоянд. Ин мактаби варзишӣ аз рӯйи 7 намуди варзиш волейбол, футбол, гӯштини миллӣ, гӯштини тарзи ҷудо, варзиши сабук, шашка шоҳмот фаъолият намуда, дар мусобиқаҳои ноҳиявӣ, вилоятӣ, ҷумҳуриявӣ ва берун аз он иштирок мекунанд. Аз рӯйи таҳлил маълум гардид, ки варзишгарони муассисаи мазкур дар 28 мусобиқаи сатҳи вилоятӣ иштирок намуда, аз он 113 адад медал ба даст овардаанд, ки аз ин 51 медали тилло, 40 медали нуқра ва 22 медали биринҷӣ мебошанд. Дар 16 мусобиқаи ҷумҳуриявӣ бошад, иштироки худро таъмин намуда, сазовори 65 адад медал гардидаанд, ки ин миқдор 23-то тилло, 20-то нуқра ва 22 - тои он медали биринҷӣ аст. Инчунин варзишгарони ноҳия дар 9 мусобиқаи Чемпионати Ҷумҳурии Тоҷикистон низ ширкат варзида 20-медал: 4-то тилло, 7-то нуқра, 9-то биринҷӣ ба даст овардаанд, ки нисбат ба 11 моҳи соли 2022, 7-медал зиёд мебошад. Дар ин замина, Пирхуҷаи Ҷурабек дар мусобиқаи ҷумҳуриявӣ оид ба «Гӯштингирӣ» ҷойи якум, Асоев Абӯалӣ дар мусобиқаи ҷумҳуриявии гӯштини миллӣ ҷойи дуюм ва Қадамов Асҳобиддин дар мусобиқаи ҷумҳуриявӣ дар гӯштини миллӣ ҷойи сеюмро ишғол намуданд.