БАРОИ ҲИФЗИ ПАРАНДАГОН ДАР ЗИМИСТОН ДАР ҶОЙҲОИ МУАЙЯН ГАНДУМ ПОШИДАНД

   Имрӯз 16 январи соли 2023 дар асоси нақшаи чорабиниҳо барои ҳифзи саршумори парандагон дар сардии зимистони солҳои 2022-2023 аз ҷониби шуъбаи ҳифзи муҳити зист ва соҳибкорони ҷамоатҳои шаҳраку деҳоти ноҳияи Ҷалолиддини Балхӣ дар талу теппаҳо ва мавзеъҳои наздикӯҳӣ корҳои биотехникӣ анҷом дода шуда, дар ҷойҳои муайян ба миқдори 100 кг гандум ва маккаи дон пошида шуд. Тибқи иттилои сардори шуъбаи ҳифзи муҳити зисти ноҳия Хушвахтзода Мақсуд вобаста ба боду ҳаво дар ҳолати зарурӣ чунин корҳо дар дигар мавзеъҳо ва минтақаҳои ноҳияи Ҷалолиддини Балхӣ низ гузаронида мешаванд. Мавриди зикр аст, ки дар нимбиёбонҳои Тоҷикистон ҳар сол садҳо намуди парандагонро дидан мумкин аст, ки баъзеи онҳо муқимӣ буда, дигарашон мавсимй ё роҳгузару кӯчӣ мебошанд. Хусусан, кабки биёбонӣ, сӯфитурғайи пӯпидор, ҷуғз, гунҷишкҳо, магасхӯрак бештар вомехӯранд. Инчунин дар обанбору кӯлу дарёҳои Тоҷикистон шабонапар, лаклаки сиёҳ, қози ҳиндӣ, мурғобии сурх, мурғобии паҳннӯл, мурғобии сафед, кашқалдоқмурғобӣ, қассобак, моҳихӯрак, гунҷишки обии сафедшикам, дурроҷи ало, гунҷишки ҷигарранги обӣ ва ғайра ҳастанд. Дар маҳалҳои аҳолинишин ва водиҳои кӯҳсори Тоҷикистон бештар ба сӯфитурғайи пӯпидор, гунҷишкхо, саъба, фотимачумчуқ, мусича, аккаи ало, эзорсурхак, тутпухтак, майна, гунҷишкҳои испании саҳроӣ, фароштурук ва булбул вохӯрдан мумкин аст. Дар дашту доманаи кӯҳҳои Тоҷикистон куркурикарок, зоғи кабуд, гунҷишки даштӣ, гунҷишки ало, сӯфитурғайи саҳроӣ зиндагӣ мекунанд. Дар ҷангалу даштҳои кӯҳӣ кабк, харкафтар, ҷуғз, шоҳин, аккаи сиёҳ, алошақшақа, зардак, пашшахӯрак, булбул, фотимачумчуқи калон вомехӯранд. Иқлими мусоиди водию дараҳои Тоҷикистон ва фаровонии хӯрок боиси зиёд шудани парандаҳои муқимӣ гаштааст. Ҳоло намудҳои онҳо аз 40 зиёд аст. Онҳо имкон доранд, ки аз баландкӯҳҳо ба дараю водиҳо ва саҳроҳо фаромада, зимистонро гузаронанд. Бояд тазаккур дод, ки ҳамасола Академияи миллии илмҳои Ҷумҳурии Тоҷикистон, Институти зоология ва паразитологияи ба номи Е. Н. Павловский дар якҷоягӣ бо Иттиҳоди ҳифзи табиат ва гуногунии биологии Тоҷикистон яке аз парандаҳои нодири Тоҷикистонро бо мақсади барқарор ва афзун намудани саршумори он ҳамчун парандаи сол интихоб менамоянд.

Навиди Балх