АКСИЯИ ҲИЗБӢ: "ЛИБОСИ МИЛЛӢ - МУАРРИФГАРИ МИЛЛАТ"

            Бо ибтикори Кумитаи иҷроияи Ҳизби Халқии Демократии Тоҷикистон дар ноҳияи Ҷалолиддини Балхӣ ва иштироки фаъоли шуъбаи кор бо занон аксияи фарҳангиву маърифатӣ таҳти унвони “Либоси миллӣ - муаррифгари миллат” баргузор гардид. Иқдомро Кибриё Абдулова, мудири шуъбаи кор бо занони кумитаи иҷроия роҳбарӣ намуд. Мақсади аслии баргузории ин чорабинӣ ҳифзи арзишҳои миллӣ, пос доштани фарҳанги ниёгон ва пешгирӣ аз паҳншавии анъанаҳои бегона дар тарзи либоспӯшии ҷомеа, бахусус байни занону ҷавондухтарон мебошад.

 Тавре таъкид шуд, либоси миллӣ на танҳо рамзи зебоӣ ва ҳунари бадеии мардум, балки бахше аз худшиносии миллист, ки таъриху фарҳанги куҳанбунёди тоҷиконро дар худ таҷассум мекунад. Дар суханрониҳо таъкид гардид, ки бонувони тоҷик аз замонҳои хеле қадим либосҳои миллии хоси худро доштаанд. Ин анъанаҳо то имрӯз ҳамчун мероси гаронбаҳо боқӣ монда, бо рангубори гуногун ва шаклу услуби махсуси худ меъёрҳои ахлоқиву эътиқодии ҷомеаи бостониро инъикос менамоянд. Масъулин бар онанд, ки ҳифзи чунин мерос танҳо бо истифодаи пайвастаи он дар зиндагии имрӯзӣ имконпазир аст.

Аз ин рӯ, ворид шудани либосҳои ба ном динӣ, ки ба фарҳангу урфу одати тоҷикон бегонаанд, бояд ҷиддан маҳдуд карда шавад. Тавре таъкид шуд, мубориза бо чунин падидаҳои бегона на танҳо ҳимояи симои миллӣ, балки кафолати худшиносӣ ва иттиҳоди ҷомеа мебошад. Аксияи мазкур бо иштироки фаъолонаи аъзои ҳизб баргузор гардида, ба як минбари муҳими тарғиби либоси миллӣ ва арҷгузорӣ ба мероси фарҳангӣ табдил ёфт.