ОСОРХОНАИ НОҲИЯ ҲАМДИДОРИИ ДӮСТОНИ КУҲАН ШУД

          Санаи  27 августи соли 2025 гурӯҳи ҳамсинфон - хатмкунандагони солҳои 1974-1984-и муассисаҳои таҳсилоти миёнаи умумии №58-и ноҳияи Ҷалолиддини Балхӣ ва №12-и ноҳияи Вахш, аз ҷумҳуриҳои Ӯзбекистон, Қазоқистон ва ноҳияи Вахш пас аз 41 сол ба дидори ҳам омаданд. Мақсади асосии ин вохӯрӣ ҳамдилию дӯстии қадима ва ошноӣ бо мероси фарҳангиву таърихии Тоҷикистон арзёбӣ гардид.

Ташрифи меҳмонон ба Осорхонаи таъриху кишваршиносии ноҳияи Ҷалолиддини Балхӣ аввалин марҳалаи ин вохӯрӣ буд. Дар Осорхона меҳмонон бо намунаҳои гуногуни нигораҳои таърихӣ ва фарҳангӣ шинос шуда, бо таърихи куҳан ва анъанаҳои мардуми минтақа ошноӣ пайдо карданд. Синну соли меҳмонон ба назар гирифта, чунин боздидҳо барои онҳо имконият фароҳам овард, ки таҷрибаи фарҳангиву таърихии минтақа ва арзишҳои ниёгонро аз наздик эҳсос намоянд. Дар рафти боздид роҳбарияти Осорхона ба меҳмонон маълумотҳои муфассал оид ба таърихи нигораҳо, манзараҳои табиӣ ва мероси фарҳангии ноҳияи Ҷалолиддини Балхӣ пешниҳод намуд. Ҳамзамон, меҳмонон тавассути чунин вохӯриҳо на танҳо бо фарҳанг ва анъанаҳои мардуми тоҷик ошно шуданд, балки имконият пайдо карданд, ки робитаҳои фарҳангии байни кишварҳо ва минтақаҳои ҳамсояро тақвият бахшанд.

Меҳмонон аз қабули гарму самимии роҳбаладон сидқан изҳори миннатдорӣ намуда, дар китоби қайдҳои Осорхона соядасти пурмеҳри худро гузоштанд. Ташрифи меҳмонон - ҳамсинфон ба Осорхона барои ҷалби таваҷҷуҳи ҷавонон ба таърих ва фарҳанги миллӣ аҳамияти хосса дошта, ҳамзамон барои густариши ҳамкории фарҳангӣ ва таҳкими дӯстӣ миёни Тоҷикистону Ӯзбекистон ва Қазоқистон як иқдоми муҳим арзёбӣ мешавад.