ПЕШГИРИИ БЕГОНАПАРАСТӢ - МАСЪУЛИЯТИ УМУМИИ ҶОМЕА

      Санаи  15 сентябри соли ҷорӣ дар асоси нақшаи тасдиқнамудаи Бахши кор бо занон ва оилаи назди мақомоти иҷроияи ҳокимияти давлатии ноҳияи Ҷалолиддини Балхӣ, вохӯриҳои маърифативу тарбиявӣ бо сокинон дар деҳаю маҳаллаҳои Ҷамоати деҳоти Золи Зар баргузор гардиданд. Дар ҷараёни ин мулоқот масъулин масъалаи мубрами рӯз - пешгирии бегонапарастӣ ва тақлид ба расму ойину арзишҳои бегонаро мавриди баррасӣ қарор доданд. Таъкид гардид, ки раванди бегонапарастӣ имрӯз ба яке аз мушкилоти ҷиддии ҷомеа табдил ёфта, метавонад ба ҳифзи арзишҳои миллӣ ва асолати фарҳангии кишвар таҳдид намояд. Ба гуфтаи масъулин, танҳо бо талоши якҷояи ҷомеа ва ҳамкории давлату мардум имкон аст, ки паҳншавии чунин падидаҳои номатлуб пешгирӣ гардад. Ҳамзамон дар вохӯрӣ ба суханрониҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон истинод оварда шуд. Пешвои миллат дар баромадҳои худ ҳамеша зарурати муқовимат ба хурофот, иртиҷоъпарастӣ ва тақлид ба урфу одатҳои бегонаи бетаъсир ба фарҳанги миллиро таъкид намуда, гуфтаанд: «Сиёсатмадорону фарҳангиён ва зиёиёни моро зарур аст, ки дар самти фаҳмондадиҳии моҳияти равандҳои муосир, мубориза бо хурофоту иртиҷоъпарастӣ ва тақлид ба расму оинҳои бегона миёни ҷомеа корҳои тарғиботиро тақвият бахшида, рисолати сиёсиву иҷтимоӣ ва фарҳангии худро дар назди халқу Ватан содиқона иҷро намоянд». Бо такя ба ин ҳидоятҳо, масъулин зикр карданд, ки ҳар як шаҳрванди кишвар бояд мубориза бо бегонапарастиро мисли як вазифаи шахсӣ ва ватандӯстона қабул намояд. Зеро фарҳанг ва ҳувияти миллӣ пояи асосии бақои давлату миллат ба шумор меравад. Мулоқотҳои мазкур на танҳо дар Ҷамоати деҳоти Золи Зар, балки дар деҳаҳои Балхиён ва Деҳқонободи Ҷамоати деҳоти Навбаҳор низ баргузор гардида, дар онҳо сокинон фаъолона ширкат варзиданд. Бояд тазаккур дод, ки чунин вохӯриҳои маърифатӣ барои баланд бардоштани худшиносии миллӣ ва таҳкими якпорчагии ҷомеа нақши муассир доранд.