ШАНБЕГӢ - ҚАДАМИ ДИГАР БА СӮЙИ МУҲИТИ ЗИСТИ СОЛИМ

          Субҳи рӯзи 20 сентябри соли 2025 бо ташаббуси мақомоти иҷроияи ҳокимияти давлатии ноҳияи Ҷалолиддини Балхӣ ва бо иштироки васеи кормандони ташкилоту муассисаҳои давлатӣ, намояндагони ҷамоатҳои шаҳраку деҳот, бахши ҷавонон ва варзиши ноҳия, идораи коммуналӣ, кормандони соҳаҳои маорифу тандурустӣ ва дигар сохторҳои дахлдор, шанбегии умуминоҳиявӣ баргузор гардид. Ин иқдом бо мақсади тоза нигоҳ доштани муҳити зист, баланд бардоштани сатҳи фарҳанги ободонӣ ва зебосозии муҳити зиндагии сокинон роҳандозӣ шуда, саҳми арзандае дар нигоҳдории симои зебои ноҳия гузошт. Дар ҷараёни шанбегӣ кӯчаи марказии ноҳияи Ҷалолиддини Балхӣ, атрофи муассисаҳои маъмурӣ, таълимӣ ва тиббӣ, боғҳо, хиёбонҳо, роҳҳои асосии ҷамоатҳои шаҳраку деҳот, шоҳроҳи байналмилалӣ ва оромгоҳҳо тозаву озода гардиданд. Сокинону кормандон партовҳоро барчида, алафҳои бегона ва хасу хошокро тоза намуда, ҳамзамон дарахтонро сафед карда, обмонии мунтазами гулҳо, буттаҳо ва дарахтон низ ба роҳ монда шуд, ки ин ҳама ба зебоии табиӣ ва муҳити солими зист саҳм гузошт. Шанбегии имрӯза на танҳо амали тозагӣ, балки ҷиҳати таҳкими ҳисси ватандӯстӣ, масъулиятшиносӣ ва ҳамбастагии сокинон дар ободонии макони зист низ хидмат кард.