ШУКРОНА МЕКУНАМ, КИ ТОҶИКАМУ ТОҶИКИСТОНИАМ!

      (Таассурот аз "Намоишгоҳи маҳсулоти кишоварзӣ, саноатӣ, ҳунарҳои мардумӣ ва таомҳои миллии вилояти Хатлон" дар шаҳри Алмаатои Ҷумҳурии Қазоқистон) Аз дидани ҳунари волои мардумии тоҷик, бӯидани накҳати шакарбори маҳсулоти кишоварзии Тоҷикистони биҳиштосо, лаззати ҷонофарини таомҳои миллӣ ва дидану шунидани фарҳангу ҳунари тамаддунофари кишвари нозанинам ба ваҷд омадани тамошибонони қазоқӣ маро дар дилу қалб танҳо як чиро устувортару қавитар гардонид: ШУКРИ ЯЗДОНИ БЕҲАМТО, КИ ТОҶИКАМУ ТОҶИКИСТОНӢ ҲАСТАМ! Гумон мекунам, ки рӯзҳои 20-21 сентябри соли 2025 мардуми қазоқ на танҳо аз тамошои ҳунарҳои мардумию маҳсулоти кишоварзии Тоҷикистон ва таомҳою фарҳанги мо завқ бурданд, балки дар тамоми Қазоқистон накҳати ҷаннатулбақои Тоҷикистон мутантан танин карду ба хонадон ва қалби ҳар як Қазоқистонӣ сурур бахшид.

Дар ҳақиқат бо маҳорати хоса оростани намоишгоҳ аз тарафи Хатлониён ҳамчун хони пурнозу неъмат бо ҳазорон ранг ба дили садҳо нафар фараҳу шодӣ бахшид ва ба оянда назари некро ба бор дод. Зебоии ин хон маро низ мафтун сохт. Зиҳӣ, дастандаркорони вилояти Хатлон! Тавонистанд, ки дар симои як вилоят Тоҷикистони соҳибтамаддунро дар арсаи ҳамҷаворӣ ба кишварҳои дигар дар сатҳи олӣ муаррифӣ намоянд.

Дастгирии Ҳукумати Ҷумҳурии Тоҷикистон бо сарварии Пешвои муаззами миллат муҳтарам Эмомалӣ Раҳмон ва роҳбарии бевоситаи раиси вилояти Хатлон муҳтарам Давлаталӣ Саид боис гардид, ки ин чорабинӣ дӯстии халқҳои тоҷику қазоқро устувортар гардониду ба он ҳусни меҳру муҳаббатҳоро афзун намуд. Чунин тадбирҳо бори дигар аз фарҳангсолорию мардумсолории Пешвои муаззами миллат ва рисолати рафоқатпешагии мардуми сарбаландӣ тоҷик гувоҳӣ медиҳад.

Пайравони ӯ низ, махсусан хизматчиёни давлатӣ чун хизматгузорони халқ иқдомҳои ваҳдатофарини Пешворо маҳаки кори хеш медонанд ва мегӯянд: Дӯстиро ҷустуҷӯ дорем мо, Аз амонӣ гуфтугӯ дорем мо! Ё худ: Дӯст ояд сахт дар оғӯш гир, Расми хуби тоҷиконро гум макун. ЗИҲӢ ПЕШВОИ МУАЗЗАМИ МИЛЛАТ, КИ БАҚОИ МИЛЛАТ ВА ДАВЛАТДОРИРО ДАР ЗИМОМИ СОЗАНДАГИЮ ОБОДКОРӢ ВА СУЛҲУ ВАҲДАТ ОРОСТАӢ! Ва мегӯем: Месароям ман суруди сулҳро бо сози сулҳ, То шавад дунё пур аз овози сулҳ! ЗИНДАВУ ПОЯНДА БОД, СУЛҲУ ВАҲДАТИ АБАДӢ ВА ДӮСТИИ ХАЛҚҲО ДАР ТАМОМИ ҶАҲОН! Шукурзода ШАҲЛО, муовини раиси ноҳияи Ҷалолиддини Балхӣ оид ба соҳаи иҷтимоӣ