ТОБИСТОНА

     Фасли тобистон ҳамчун фасли истироҳатӣ барои хонандагону толибилмон хусусиятҳои хоси худро дорад. Махсусан, фасли тобистон бо истироҳату фароғаташ аз дигар фаслҳо фарқ дорад. Фасли тобистон бештар ба кӯдакону наврасон хуш меояду бесаброна интизори фаро расидани ин фасл мешаванд. Айни ҳол дар ҳама шаҳру ноҳияҳои кишвари азизамон таътили тобистона идома дорад. Мувофиқи маълумотномаи Шуъбаи маорифи Мақомоти иҷроияи ҳокимияти давлатии ноҳияи Ҷалолиддини Балхӣ дар бораи ташкили истироҳати тобистонаи кӯдакон ва наврасон дар соли 2023 ҷиҳати иҷрои қарори раиси вилояти Хатлон аз 4 майи соли 2023, №97 ва қарори Ҳукумати Ҷумҳурии Тоҷикистон аз 28 марти соли 2023, №126 «Дар бораи ташкили истироҳати тобистонаи кудакон ва наврасон дар соли 2023» рӯзи 15 майи соли 2023 дар толори шуъбаи маориф бо иштироки кормандон ва директорони муассисаҳои таълимӣ ва томактабии ноҳия мавриди баррасӣ қарор дода шуд. 

   Боздиди муовини раиси ноҳияи Ҷалолиддини Балхӣ Сангализода Қумринисо аз рафти сохтмони синфхонаҳои иловагии муассисаҳои ҳудуди Ҷамоати шаҳраки Гулистон. 

 ДАВРИ ДУЮМИ ОЗМУНИ ҶУМҲУРИЯВИИ «ТОҶИКОН»-ОИНАИ ТАЪРИХИ   МИЛЛАТ» Санаи 6 июни соли 2023

    Дар толори муассисаи таҳсилоти миёнаи умумии №2-и ноҳияи Ҷалолиддини Балхӣ даври дуюми озмуни ҷумҳуриявии «Тоҷикон»-оинаи таърихи миллат» бо иштироки аъзои ҳакамон Саодат Алаёрова, намояндаи Мақомоти иҷроияи ҳокимияти давлатии ноҳия Зуҳро Атабоева, мудири бахши кор бо занон ва оила Ҷаъфарзода Фарзона, мудири бахши кор бо ҷавонон ва варзиши ноҳия Қурбонзода Хуршед ва директории китобхонаи марказӣ Наргис Салимова баргузор гардид. Дар озмуни мазкур хонандагони синфҳои 5-11-и муассисаҳои таҳсилоти миёнаи умумӣ ва кормандони баъзе ташкилоту муассисаҳо иштирок намуда, ғолибон ба даври сеюми вилоятӣ роҳхат гирифтанд. 

                    БОЗДИД АЗ ВАЗЪИ СОҲАИ МАОРИФ

         Рӯзи 23 майи соли 2023 муовини раиси ноҳияи Ҷалолиддини Балхӣ Сангализода Қумринисо аз вазъи соҳаи маориф дар ноҳияи Ҷалолиддини Балхӣ дидан намуда, барои баланд бардоштани таълиму тарбия, либоси мактабӣ, иштироки хонандагон дар олимпиадаҳои ҷумҳуриявӣ, ҷалби духтарон ба зинаҳои таҳсилот, инчунин оид ба ободонӣ ва таъмири гирду атроф ва дохили муассисаҳои таълимӣ бо иштироки омӯзгорон суҳбату вохӯриҳо доир намуданд.

ОЗМУНИ ДАВРИ НОҲИЯВИИ «ФУРӮҒИ СУБҲИ ДОНОӢ КИТОБ АСТ» БАРГУЗОР ГАРДИД

   Санаи 3 майи соли 2023 дар муассисаи таҳсилоти миёнаи умумии №33-и ноҳияи Ҷалолиддини Балхӣ даври ноҳиявии озмуни ҷумҳуриявии "Фурӯғи субҳи доноӣ китоб аст" баргузор гардид. Озмун бо иштироки намояндагони Мақомоти иҷроияи ҳокимияти давлатии ноҳия, шуъбаи маориф, директорони муассисаҳои таҳсилоти миёнаи умумӣ ва ҷамъи довталабон баргузор гардид. Аз оғоз саҳни муассиса пур аз ҳаводорону иштирокчиёни озмун гардид, ки ҳар кадом бо ҳазорон боварӣ иштирок намуда, муваффақ шудан мехостанд. 

                  «ҲАФТАИ КИТОБИ КӮДАКОНУ НАВРАСОНИ ТОҶИКИСТОН»

  Ҳамасола аз 2 то 9 апрел дар шаҳру навоҳии кишвар Фестивали умумиҷумҳуриявӣ таҳти унвони «Ҳафтаи китоби кӯдакону наврасони Тоҷикистон» доир мегардад, ки дар доираи он як қатор маҳфилу чорабиниҳо баргузор карда мешаванд. Аз ҷумла санаи 4 апрели соли 2023 дар толори китобхонаи марказии ноҳия дар якҷоягӣ бо китобхонаи бачагонаи ноҳияи Ҷалолиддини Балхӣ чорабинии «Ҳафтаи китоби кӯдакону наврасони Тоҷикистон» бахшида ба 145-солагии Сардафтари адабиёти муосири тоҷик, Қаҳрамони Тоҷикистон Садриддини Айнӣ баргузор гардиданд. Дар чорабинии мазкур намояндаи Мақомоти иҷроияи ҳокимияти давлатии ноҳия Зуҳро Атабоева, мутахассиси пешбари бахши фарҳанг Гулмурод Кабиров, директори китобхонаи марказӣ Имомзода Адолат, адиб ва сармуҳаррири рӯзномаи ноҳиявии «Навиди Балх» Ибодуллоҳ Одиназода, мудири шуъбаи таблиғот ва иттилооти КИ ҲХДТ дар ноҳия Абдухолиқ Розиқов, мудирони филиалҳои китобхона ва кӯдакону наврасон иштирок доштанд. 

 КВОТА - ИМТИЁЗ БА ТАҲСИЛ  Санаи 31 марти соли ҷорӣ дар толори шуъбаи маорифи ноҳияи Ҷалолиддини Балхӣ даври озмуни ноҳиявии санҷишҳои имтиҳонии дохилшавӣ тариқи квотаи Президенти Ҷумҳурии Тоҷикистон баргузор гардид. Дар ин рӯз аъзои комиссияи квотаи Президентӣ аз тарафи Мақомоти иҷроияи ҳокимияти давлатии ноҳияи Ҷалолиддини Балхӣ иштирок намуданд. Тибқи иттилои шуъбаи маорифи ноҳия дар озмун хонандагони муассисаҳои ҳудуди ноҳия ҷиҳати дарёфти роҳхат ба даври ниҳоӣ 139 нафар хатмкунандагон роҳхат гирифта, ширкат варзиданд. Соли ҷорӣ шумораи квотаи Президентӣ барои ноҳияи Ҷалолиддини Балхӣ 24 нафарро ташкил намуд, ки аз ҷумла 12 нафар духтар аз рӯи 12 ихтисос роҳхат ба даври вилоятӣ гирифта аз рӯи ҳар ихтисос то шаш нафар довталаб ба даври ниҳоии озмун роҳ ёфтанд.  Ёдовар мегардем, ки ҷиҳати баланд бардоштани савияи дониши хонандагон ва ҳавасманд гардонидани ҷавонон дар рӯҳияи илмомӯзиву маърифатпарварӣ Ҳукумати кишвар таҳти сарварии Пешвои муаззами миллат муҳтарам Эмомалӣ Раҳмон ба наврасону ҷавонон таваҷҷуҳи хосса зоҳир намуда, бобати дарёфти чеҳраҳои болаёқат имтиёзҳои заруриро фароҳам овардаанд. Парвина АҶИКОВА, "НАВИДИ БАЛХ"

 САФАРИ КОРИИ РАИСИ ВИЛОЯТИ ХАТЛОН МУҲТАРАМ ДАВЛАТАЛӢ САИД БА НОҲИЯИ ҶАЛОЛИДДИНИ БАЛХӢ

  Дар арафаи ҷашни Наврӯз субҳи имрӯз раиси вилояти Хатлон муҳтарам Давлаталӣ Саид ба ноҳияи Ҷалолиддини Балхӣ сафар намуд. Дар ин сафар раиси вилоят дар деҳаи «Чорбоғ»-и ҷамоати деҳоти Навободи ноҳияи Ҷалолиддини Балхӣ Муассисаи таълимии наву замонавиро, ки бахшида ба ҷашни Истиқлолияти давлати бунёд ёфтааст ва ба ҷашни Наврӯзи фархунда рост омадааст ҳамчун туҳфаи идона ба истифода супорид. Таълимгоҳ аз ду ошёнаи барҳаво, 10 синфхона, ошхона, китобхона ва ҳуҷраҳои иловагӣ иборат буда, барои зиёда аз 600 нафар хонандагон дар ду баст пешбини шудааст. Сохтмони муассисаи таълимӣ бо назардошти фарогирии ҳарчи бештари хонандагон ба илмомузӣ, махсусан бо зиёд шудани теъдоди хонандагон дар доираи татбиқи барномаҳои ҳукуматии марбут ба рушди соҳаи маориф ва таҳкими инфрасохтори соҳа қомат афрохта бо мавриди истифода қарор гирифтани он шумораи муассисаҳои таълимӣ дар ноҳияи Ҷалолиддини Балхӣ ба 71 муассиса расид. Акнун ин таълимгоҳ ҳамчун муассисаи таълимии миёнаи умумии №71 фаъолияти хешро идома хоҳад дод.

                                                            ВОХӮРИИ МУФИД БО ХОНАНДАГОН

    Санаи 14 феврали соли 2023 дар гимназияи давлатии №1-и ноҳияи Ҷалолиддини Балхӣ бо иштироки сармутахассис-котиби комиссия оид ба ҳуқуқи кӯдаки назди Мақомоти иҷроияи ҳокимияти давлатии ноҳияи Ҷалолиддини Балхӣ Барно Саидова, муовини сардори Раёсати ҳифзи ҳуқуқи кӯдаки Вазорати маориф ва илми Ҷумҳурии Тоҷикистон Фирӯз Султонзода, мудири шуъбаи маорифи ноҳия Хайрулло Ҳакимзода вохӯрии муфид оид ба самти пешгирии омилҳои номатлуби иҷтимоӣ байни ноболиғону ҷавонон, зӯроварӣ, рафти иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» бо омӯзгорон, хонандагон ва волидон баргузор гардид. Барно Саидова зимни суханронии хеш зикр дошт, ки масъулияти падару модар дар таълиму тарбияи фарзанд дар рӯҳияи инсондӯстӣ, ифтихори ватандорӣ, эҳтироми арзишҳои миллӣ, умумибашарӣ ва фарҳангӣ, инчунин ҳифзи ҳуқуқу манфиатҳои фарзанд, раванди мақсаднок ба воя расонидани фарзанд аз ҷониби падару модар, муассисаи таълимӣ, ҷомеа ва ба зиндагии мустақилона омода намудан аст. Ҳамчунин дар навбати худ дигар баромадкунандагон низ оид ба мавзӯъҳои болозикр андешаронӣ намуданд. Чунин вохӯриҳо дар муассисаҳои таҳсилоти миёнаи умумии ҷамоатҳои деҳоти Калинин, Ҳалевард ва Навоӣ баргузор гардид.

                                                                    ҚАДРДОНӢ

    Санаи 7 феврали соли 2023 дар муассисаи таҳсилоти миёнаи умумии №1 бо супориши раиси ноҳияи Ҷалолиддини Балхӣ муҳтарам Холмурод Раҳмон аз тарафи мудири бахши кор бо занон ва оилаи Мақомоти иҷроияи ҳокимияти давлатии ноҳия Ҷаъфарзода Фарзона вохӯрӣ бо омӯзгорон ва волидон баргузор гардид. Аз ҷумла баргузории чорабинии тарғиботии «Фарзанди босавод-ифтихори модар» дар доираи иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», вобаста ба ҷалби модарон ба мактаб ва иштироки онҳо дар соатҳои дарсӣ дар самти иҷрои дастуру супоришҳои Асосгузори сулҳу ваҳдати миллӣ - Пешвои миллат, муҳтарам Эмомалӣ Раҳмон суҳбат гузаронида шуд. Дар вохӯрӣ якчанд нафар омӯзгорони пуртаҷриба аз ҷумла омӯзгороне, ки аз фанни забони руссӣ дарс мегӯянд бо мукофотпулӣ қадрдонӣ карда шуданд. Ҳамчунин ингуна вохӯрӣ дар муассисаи таҳсилоти миёнаи умумии №10 низ баргузор гардид.