БАСКЕТБОЛ - БА ИФТИХОРИ РӮЗИ ҒАЛАБА

      Бо мақсади арҷгузорӣ ба ҷонфидоиҳо ва қаҳрамониҳои ҷанговарони Ҷанги Бузурги Ватанӣ ва дар руҳияи ватандӯстӣ тарбия намудани насли наврас, 7 майи соли 2025 дар толори варзишии Муассисаи таҳсилоти миёнаи умумии №10 мусобиқаи кушоди баскетбол миёни дастаҳои бонувони муассисаҳои таълимии ноҳияи Ҷалолиддини Балхӣ баргузор гардид.

Ин мусобиқа бо ташаббуси Муассисаи давлатии мактаби варзишии ноҳия бахшида ба ҷашни 80-солагии Рӯзи Ғалаба бар фашизм ташкил карда шуда, дар он 7 дастаи бонувон аз муассисаҳои таълимии гуногуни ноҳия иштирок карданд.

Ҳадафи асосии баргузории мусобиқа ҷалби бештари духтарон ба тарзи ҳаёти солим, таҳкими дӯстию ҳамдигарфаҳмӣ миёни наврасон ва баланд бардоштани сатҳи омодагии варзишии онҳо арзёбӣ мегардад. Мусобиқа дар фазои дӯстона ва рақобати солим ҷараён гирифта, бозингарони ҷавон маҳорати хуби варзишии худро нишон доданд.

Пас аз гузаронидани чанд даври мусобиқа, дастаи бонувони МТМУ №10 бо бозии ҷаззоб ва ҳамоҳангона сазовори ҷойи аввал гардид. Ҷойи дуввум ба дастаи МТМУ №49 ва ҷойи сеюм ба дастаи МТМУ №16 дода шуд. Дар анҷом, дастаҳои ғолиб бо Ҷом, Диплом ва туҳфаҳои хотиравии Муассисаи давлатии мактаби варзишии ноҳия қадрдонӣ шуданд. Ин гуна чорабиниҳои варзишӣ на танҳо ҷиҳати рушди қобилиятҳои ҷисмонӣ ва варзишии хонандагон мусоидат менамоянд, балки ҳисси ватандӯстӣ ва ифтихор аз таърихро дар қалби онҳо таҳким мебахшанд.