ДАР ДОИРАИ УСУЛИ "ДЕҲА БА ДЕҲА": МУЛОҚОТИ МАСЪУЛИН БО СОКИНОНИ МАҲАЛ

   28 майи соли 2025, дар доираи амалӣ намудани усули самараноки кор бо аҳолӣ таҳти унвони “Деҳа ба деҳа”, дар деҳаи Даштободи Ҷамоати шаҳраки Гулистон ва деҳаи Калинини Ҷамоати деҳоти Навбаҳори ноҳияи Ҷалолиддини Балхӣ вохӯрии таблиғотӣ бо сокинони маҳаллӣ баргузор гардид. Дар вохӯрӣ муовинони раисони ҷамоат ва дигар масъулин иштирок намуданд.

Мақсади асосии баргузории ин вохӯриҳо - баланд бардоштани сатҳи огоҳии шаҳрвандон, махсусан ҷавонон, дар самти ҳифзи арзишҳои миллӣ, пешгирии паҳншавии унсурҳои фарҳанги бегона, мубориза бо падидаҳои ифротгароӣ ва истифодаи самараноки заминҳои наздиҳавлигӣ мебошад. Масъулин дар баромадҳои худ ба масъалаи риояи фарҳанги миллии тоҷикон дар либоспӯшӣ таваҷҷуҳи махсус зоҳир намуда, изҳор доштанд, ки солҳои охир таъсири фарҳангҳои бегона, бахусус дар миёни насли ҷавон ба мушоҳида мерасад.

 Дар ин замина, тарғиби либоси миллӣ ҳамчун яке аз омилҳои ҳифзи ҳувияти миллӣ муҳим арзёбӣ карда шуд. Ҳамзамон, дар ҷараёни вохӯриҳо масъалаи пешгирии шомилшавии ҷавонон ба гурӯҳҳои ифротгаро ва террористӣ мавриди муҳокима қарор гирифт. Қайд гардид, ки бедории сиёсӣ ва ахлоқии ҷавонон, боло бурдани маърифати ҳуқуқӣ ва динии онҳо, инчунин иштироки фаъолона дар ҳаёти ҷомеа метавонад нақши муҳим дар ҳифзи субот ва амният дошта бошад.

Зимни баромадҳо, масъулин инчунин ба масъалаи истифодаи оқилона ва сарфакоронаи неруи барқ дахл намуда, сокинонро ба сарфаи неруи барқ, пардохти саривақтии ҳаққи истифода ва ҳифзи дастгоҳҳои барқӣ даъват карданд. Сокинони деҳаҳо бо хушнудӣ аз ташкили чунин чорабинӣ изҳори миннатдорӣ намуда, онро як иқдоми судманд дар ҷиҳати баланд бардоштани сатҳи дониш ва маърифати иҷтимоиву фарҳангии ҷомеа арзёбӣ карданд.