ГАР ШИНОВАР НЕСТӢ, ПО БАР ЛАБИ ДАРЁ НАМОН!

      Дар мавсими гармо ва афзоиши гардиши мардум ба соҳилҳои дарёву кӯлу обанборҳо, масъалаи таъмини бехатарии сокинон, бахусус наврасону ҷавонон, дар маркази таваҷҷуҳи сохторҳои дахлдор қарор дорад. Бо мақсади пешгирӣ аз ҳодисаҳои ғарқшавӣ ва ҳифзи ҷони шаҳрвандон, дар ноҳияи Ҷалолиддини Балхӣ тибқи нақшаи кории мақомоти иҷроияи ҳокимияти давлатии ноҳия, гурӯҳҳои махсуси корӣ ташкил гардидаанд. Ин гурӯҳҳо, ки иборат аз намояндагони бахши Раёсати Кумитаи ҳолатҳои фавқулода ва мудофиаи гражданӣ дар вилояти Хатлон, шуъбаи Вазорати корҳои дохилӣ, шуъбаи рушди иҷтимоӣ ва робита бо ҷомеа, бахши кор бо ҷавонон ва варзиш, шуъбаи маориф ва котиби мақомоти васояту парасторӣ мебошанд, ҳамарӯза дар соҳилҳои дарё, кул, ҷӯйборҳо ва ҳавзҳои обӣ рейдҳои муштарак мегузаронанд.

Ҳадафи онҳо - пешгирӣ аз оббозии ғайриқонунӣ дар ҷойҳои хатарнок, огоҳ намудани мардум аз хатарҳои эҳтимолӣ ва баланд бардоштани сатҳи масъулиятшиносии ҷомеа мебошад. Дар ҷараёни ин рейдҳо, бо наврасону ҷавононе, ки дар ҷойҳои хатарнок ҷамъ меоянд, суҳбатҳои фаҳмондадиҳӣ гузаронида шуда, қоидаҳои бехатарии оббозӣ ва оқибатҳои ғарқшавӣ шарҳ дода мешаванд. Ҳамчунин, таваҷҷуҳ ба он равона мегардад, ки ҳатто дар мавзеъҳои нисбатан ором низ эҳтиёткорӣ зарур аст, зеро садамаҳои обӣ бештар дар лаҳзаҳои беэҳтиётӣ сар мезананд.

 Масъулони бахши Кумитаи ҳолатҳои фавқулода дар ноҳияи Ҷалолиддини Балхӣ аз сокинон ва меҳмонони ноҳия даъват мекунанд, ки фарзандони худро таҳти назорат нигоҳ доранд, онҳоро бе зарурат ба кӯча ва соҳилҳои об нагузоранд ва аз оббозӣ дар ҷойҳои хатарнок ҷилавгирӣ намоянд. Ба гуфтаи онҳо, дар рӯзҳои гармо на танҳо хатари ғарқшавӣ, балки паҳншавии бемориҳои мавсимӣ ва сироятӣ низ зиёд мешавад, ки бетаваҷҷуҳӣ метавонад паёмадҳои нохуш ба бор орад. Ҳамкории наздик миёни мақомоти давлатӣ ва худи шаҳрвандон калиди асосии пешгирӣ аз ҳодисаҳои нохуш дар мавсими тобистон аст. Чунон ки мегӯянд: "Гар шиновар нестӣ, по бар лаби дарё намон!"