ҶАЛАСА ОИД БА ФАРОҲАМСОЗИИ ШАРОИТИ БЕҲТАРИ ТАҲСИЛ БАРОИ НАСЛИ НАВРАС

         Соҳаи маориф ҳамеша яке аз самтҳои муҳим ва афзалиятноки ҷомеа ба шумор меравад, зеро пешрафти дигар бахшҳои хоҷагии халқ ва рушди устувори кишвар бевосита ба сатҳу сифати таълиму тарбия вобаста аст. Аз ин рӯ, роҳбарияти ноҳия ба рушди низоми маориф таваҷҷуҳи ҷиддӣ зоҳир мекунад. Рӯзи 14 августи соли ҷорӣ дар толори шуъбаи маорифи ноҳияи Ҷалолиддини Балхӣ бо иштироки муовини раиси ноҳия Шукурзода Шаҳло ҷаласаи васеъ бо роҳбарони муассисаҳои таълимӣ баргузор гардид.

Дар ҷаласа масоили муҳими рӯз, аз ҷумла омодагӣ ба соли нави таҳсил, ҷараёни фарогирии хонандагон, тартиби ҳуҷҷатгузорӣ дар муассисаҳои таълимӣ, мушкилоти вобаста ба норасоии кадрҳо ва зарурати ҷалби омӯзгорони баландихтисос мавриди муҳокима қарор гирифт. Муовини раиси ноҳия дар ҷараёни суханронии худ таъкид намуд, ки соҳаи маориф ҳамчун пояи асосии рушди ҷомеа бояд аз ҳама гуна камбудиву норасоӣ озод бошад. Ба гуфтаи ӯ, бартараф намудани мушкилоти ҷойдошта шароит фароҳам меорад, то низоми таълимӣ бо тартиби муназзам фаъолият намуда, барои наврасону ҷавонон муҳити муносиб ва самарабахши таҳсил муҳайё гардад. Шукурзода Шаҳло бо ишора ба нақши ҳалкунандаи омӯзгорон дар тарбияи насли оянда иброз дошт:

«Соҳаи маориф яке аз самтҳои калидии ҷомеа маҳсуб меёбад ва пешрафти тамоми намуди фаъолияти хоҷагии мардум ба он вобаста аст. Барои ин зарур аст, ки камбудиҳои мавҷуда сари вақт бартараф карда шуда, шароити таълим барои хонандагон беҳтар гардад. Ин иқдом қадами созанда ба хотири ташаккули як низоми устувори таълим ва фароҳамсозии муҳити арзандаи таҳсил барои насли наврас мебошад». Дар анҷом ба масъулони соҳаи маориф ва директорони муассисаҳои таълимӣ дастур дода шуд, ки ҷиҳати омодагии ҳамаҷониба ба соли нави таҳсил, инчунин таъмин намудани муассисаҳо бо кадрҳои соҳибихтисос чораҳои зарурӣ андешанд.