ВОХӮРИИ РАИСИ НОҲИЯ БО СОКИНОНИ ҶАМОАТИ ШАҲРАКИ ГУЛИСТОН

                Санаи 15 августи соли ҷорӣ дар Қасри фарҳангии Ҷамоати шаҳраки Гулистони ноҳияи Ҷалолиддини Балхӣ мулоқоти раиси ноҳия Холиқзода Рустам Ҳикматулло бо сокинон баргузор гардид. Дар вохӯрӣ масъулини сохторҳои дахлдор, намояндагони ҷамоат ва фаъолони маҳаллӣ иштирок доштанд. Ин вохӯрӣ ба баррасии се масъалаи муҳим бахшида шуд. Аввалан, аҳамияти иҷрои нақшаи ҷамъоварии пахта ва таъмин намудани ҷамъоварии он бе талаф таъкид гардид.

Раиси ноҳия ба хоҷагиҳо ва масъулин супориш дод, ки бо ҷалби пурраи техника ва неруи корӣ ҷамъоварии пахтаро сари вақт ба роҳ монанд. Масъалаи дуюм ба истифодаи самараноку оқилонаи неруи барқ рабт дошт. Холиқзода Рустам Ҳикматулло аз сокинон даъват ба амал овард, ки бо назардошти афзоиши талабот дар фасли тобистон, неруи барқро сарфакорона истифода баранд ва дар нигоҳубини дастгоҳҳои барқӣ масъулият нишон диҳанд. Сеюмин мавзӯъ ба корҳои ободонӣ ва омодагӣ ба таҷлили ҷашни 35-солагии Истиқлолияти давлатии Ҷумҳурии Тоҷикистон бахшида шуд.

Дар ин замина, таъмиру навсозии кӯчаҳо, маҳаллаҳо ва дигар иншооти иҷтимоӣ миёни масъалаҳои асосӣ қарор гирифт. Раиси ноҳия аз масъулин талаб намуд, ки барои дар сатҳи баланд баргузор намудани ҷашн тадбирҳои мушаххас андешанд.

Баъди анҷоми вохӯрӣ, Холиқзода Рустам Ҳикматулло ба муассисаи таҳсилоти миёнаи умумии №51 ташриф оварда, раванди корҳои таъмирӣ ва омодасозии он ба соли нави таҳсилро мавриди назар қарор дод. Ӯ масъулинро вазифадор намуд, ки таъмири муассисаи мазкур ва дигар муассисаҳои ҳудуди ҷамоатро бо сифати баланд анҷом дода, шароити мувофиқ барои таҳсилу тарбияи насли наврас фароҳам созанд.