БАРГУЗОРИИ СЕМИНАРИ ОМӮЗИШИИ ҲИЗБӢ ДАР НОҲИЯ

       Имрӯз, 15 августи соли 2025 дар толори Китобхонаи марказии ноҳияи Ҷалолиддини Балхӣ бо иштироки мудири шуъбаи ташкилӣ ва кор бо кадрҳои Кумитаи иҷроияи ҲХДТ дар ноҳия Нозанин Шодиева семинари омӯзишӣ баргузор гардид. Дар ин чорабинӣ масъулини ташкилотҳои ибтидоии ҳизбӣ ширкат варзида, доир ба самтҳои муҳими фаъолияти дохилиҳизбӣ, иҷрои талаботи Оиннома ва Барномаи ҲХДТ, инчунин омӯзиши санадҳои меъёрии ҳуқуқӣ мубоҳиса ва баррасӣ сурат гирифт.

Дар ҷараёни семинар Нозанин Шодиева ба таври муфассал доир ба ҳаракати аъзои ҳизб, роҳу усулҳои дуруст ва самараноки татбиқи бандҳои Оиннома ва Барнома шарҳу тавзеҳ пешниҳод намуд. Ӯ таъкид кард, ки фаъолияти ташкилотҳои ибтидоӣ бояд бо масъулияту ҷидду ҷаҳд амалӣ шуда, ҳуҷҷатгузориҳо тибқи қоидаҳои муқарраргардида ба расмият дароварда шаванд. Ҳамзамон, барои ҷоннок намудани фаъолияти ҳизбӣ, тартиб додани коргузорӣ дар ташкилотҳо, ҷалби шахсони босаводу фаъол ба сафи аъзои ҲХДТ ва роҳандозии корҳои тарғиботиву ташвиқотӣ миёни сокинон дастуру супоришҳо ироа гардид.

Мавзӯи тарзи ороиши утоқҳои кории раисони ташкилотҳои ибтидоии ҳизбӣ низ мавриди таваҷҷуҳ қарор гирифта, зарурати баланд бардоштани сатҳи масъулият дар пешбурди кор таъкид шуд. Ин семинар ба сифати як майдони омӯзишиву таҷрибаомӯзӣ барои масъулини ҳизбӣ хидмат намуда, ба густариши фаъолияти ташкиливу тарғиботӣ дар сатҳи ноҳия мусоидат хоҳад кард.