ПАХТАКОРОНИ НОҲИЯ БО ҲОСИЛИ ФАРОВОН БА САҲРО БАРОМАДАНД

      Аз нимаи моҳи август, дар ҳамаи хоҷагиҳои деҳқонии ҷамоатҳои шаҳраку деҳоти ноҳияи Ҷалолиддини Балхӣ маъракаи пахтачинӣ расман оғоз ёфта, айни ҳол бо суръати хуб идома дорад. Пахтакорӣ дар ноҳия мақоми калидиро дар сохтори кишоварзӣ ишғол намуда, на танҳо ба таъмини бозори дохилӣ бо ашёи хоми саноатӣ, балки ба болоравии сатҳи иқтисодиву иҷтимоии аҳолӣ низ саҳми назаррас мегузорад. Ба гуфтаи масъулони соҳа, имсол кишоварзон бо рӯҳияи баланду масъулияти ҷиддӣ ба ин маъракаи муҳими тирамоҳӣ ворид шудаанд.

Мақомоти иҷроияи ҳокимияти давлатии ноҳия изҳор медоранд, ки барои дастгирии соҳаи пахтакорӣ як қатор чораҳои амалӣ андешида шудаанд. Аз ҷумла, беҳтар намудани инфрасохтори истеҳсолӣ, фароҳам овардани шароити мусоид барои истифодаи техникаи кишоварзӣ, таъмини саривақтии хоҷагиҳо бо воситаҳои зарурӣ ва ҷорӣ кардани технологияҳои муосири парваришу ҷамъоварии пахта аз самтҳои асосии кор маҳсуб меёбанд. Кишоварзони ноҳия, ки таҷрибаи тӯлонӣ дар парвариши пахта доранд, ба ҷамъоварии босифат ва саривақтии ҳосил омодагии пурра изҳор дошта, гурӯҳҳои махсуси пахтачинон низ сафарбар карда шудаанд.

Ба гуфтаи мутахассисон, шароити мусоиди иқлимӣ ва риояи қоидаҳои агротехникӣ имсол ба зиёд гардидани ҳосилнокӣ мусоидат намудааст. Пешбинӣ мешавад, ки ҳаҷми умумии ҳосили имсола нисбат ба солҳои қаблӣ бештар хоҳад буд. Масъулин изҳори умедворӣ доранд, ки бо ташкили дурусти маърака ва заҳмати содиқонаи деҳқонон, нақшаи ҷамъоварии пахта дар муҳлатҳои муайян иҷро гардида, саҳми хоҷагиҳои пахтакори ноҳия дар таъмини иқтисодиёти ҷумҳурӣ боз ҳам бештар хоҳад шуд.