ҶАВОНОН БАРОИ ҶАМЪОВАРИИ ҲОСИЛИ ПАХТА САҲМГУЗОРӢ МЕКУНАНД

       Бо ташаббуси Бахши кор   бо    ҷавонон  ва  варзиши  ноҳияи  Ҷалолиддини  Балхӣ  гурӯҳи "Зарбдор"-и ҷавонон  ба  саҳро баромада, дар ҷамъоварии ҳосили пахта саҳми арзандаи худро гузоштанд. Ин иқдом дар хоҷагии деҳқонии «Аъзамҷон»-и Ҷамоати деҳоти Навбаҳор баргузор гардид. Ҷавонон бо руҳияи баланд ва ҳисси масъулият барои иҷрои ин кори муҳим сафарбар шуда, дар паҳлӯи деҳқонон кор карданд.  Мақсад аз ташкили чунин гурӯҳҳо на танҳо мусоидат ба ҷамъоварии саривақтӣ ва беталафи ҳосил, балки тарғиби ҳисси меҳнатдӯстӣ, ватандӯстӣ ва масъулияти иҷтимоӣ миёни ҷавонон мебошад. Мудири Бахши кор бо ҷавонон ва варзиши ноҳия Саидшоҳ Исматзода зикр кард, ки ҷавонон ҳамеша ҳамчун қувваи пешбаранда дар корҳои ҷамъиятӣ ҳузури фаъол доранд ва ташкили гурӯҳҳои "Зарбдор" намунаи равшани ҳамкории насли ҷавон бо соҳаи кишоварзӣ мебошад. Иштироки ҷавонон дар ҷамъоварии ҳосили пахта аз он шаҳодат медиҳад, ки онҳо на танҳо дар арсаи варзиш ва таҳсил, балки дар рушди иқтисодии мамлакат низ нақши назаррас доранд.