ВОХӮРИИ ОМӮЗАНДА БО УСУЛИ "МАКТАБ БА МАКТАБ"

            Дар доираи иҷрои нақшаи муштараки сохторҳои дахлдори давлатӣ ва бо ибтикори Бахши кор бо ҷавонон ва варзиши ноҳияи Ҷалолиддини Балхӣ, дар муассисаи таҳсилоти миёнаи умумии рақами 10-и ноҳия хониши сиёсӣ бо усули «Мактаб ба мактаб» баргузор гардид. Мақсади баргузории ин вохӯрӣ пеш аз ҳама расонидани мазмуну муҳтавои Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба хонандагон ва волидон буд.

 Дар баробари ин, масъалаҳои мубрами рӯз, аз қабили пешгирии омилҳои номатлуб миёни наврасону ҷавонон, коҳиши сатҳи ҷинояткорӣ, ҷилавгирӣ аз шомилшавии ҷавонон ба ҳизбу ҳаракатҳои ифротию террористӣ ва зарурати ҷалби падару модар ба раванди таълиму тарбияи фарзанд мавриди баррасӣ қарор гирифтанд.

 Ҳамзамон, масъулин ба аҳамияти таҳсилоти миёнаи умумӣ таъкид намуда, ҳатмӣ будани таҳсил дар зинаи сеюмро ба иштирокдорон фаҳмониданд. Қонунҳои амалкунандаи кишвар, аз ҷумла Қонуни Ҷумҳурии Тоҷикистон «Дар бораи танзими анъана ва ҷашну маросимҳо» низ мавриди шарҳ қарор гирифта, доир ба зарурати риояи он миёни ҷомеа корҳои фаҳмондадиҳӣ сурат гирифтанд.

 Мавзуъҳои дигаре чун пешгирии худкушию худсузӣ, зарари нашъамандӣ ба солимии ҷомеа ва роҳҳои муҳофизати ҷавонон аз чунин офатҳои иҷтимоӣ низ мавриди баррасӣ қарор гирифтанд. Ҳамзамон, ҳозирин ба анҷоми корҳои ободониву тозагӣ ва саҳм гузоштан дар зебоию шукуфоии диёр даъват карда шуданд. Гуфта шуд, ки ин иқдом, яке аз роҳҳои самараноки тарбияи насли наврас ва таҳкими ҳамкории мактабу оила дар пешгирии масъалаҳои иҷтимоиву фарҳангӣ мебошад.