УСУЛИ "ДЕҲА БА ДЕҲА" - РОҲИ САМАРАНОКИ РОБИТА БО МАРДУМ

         Дар доираи татбиқи барномаҳои Ҳукумати мамлакат, ки ҳадафи асосии он тақвияти робита бо аҳолӣ ва баланд бардоштани сатҳи маърифати ҳуқуқиву иҷтимоии шаҳрвандон мебошад, дар ноҳияи Ҷалолиддини Балхӣ силсилаи вохӯриву мулоқотҳо бо усули «Деҳа ба деҳа» идома доранд. Яке аз чунин мулоқотҳо дар Ҷамоати деҳоти Маданият баргузор гардид, ки дар он намояндагони мақомоти иҷроияи ҳокимияти давлатӣ ва сохторҳои ҳизбӣ ширкат варзиданд. Аз ҷумла, муовини раиси Кумитаи иҷроияи Ҳизби Халқии Демократии Тоҷикистон дар ноҳия Фатҳулло Рауфов ва масъулони ҷамоат бо сокинон суҳбат ороста, доир ба масъалаҳои муҳим андешаҳои худро баён карданд.

Дар ҷараёни вохӯрӣ ба таври муфассал нуктаҳои асосии Паёми навбатии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ шарҳ дода шуданд. Мавзуъҳое чун риояи қонунҳо, тарбияи дурусти насли наврасу ҷавонон, омӯзиши илму дониш ва касбу ҳунар, ҷалби ҷавонон ба хизмати ҳарбӣ, инчунин саҳми онҳо дар корҳои созандагиву ватандӯстӣ мавриди баррасӣ қарор гирифтанд. Ҳамзамон, ба масъалаи ҷилавгирӣ аз шомилшавии ҷавонон ба гурӯҳҳои ифротгаро ва хатарҳои терроризму экстремизм таваҷҷуҳи махсус зоҳир гардид. Масъулин таъкид намуданд, ки ҳар як шаҳрванди Тоҷикистон бояд дар рушди ҷомеа, ободии деҳаву шаҳрак ва пешрафти иқтисодиву иҷтимоии Ватан саҳми фаъол гузорад.

Инчунин, дар вохӯрӣ масъалаи баланд бардоштани маърифати ҳуқуқии мардум, истифодаи самараноки неруи барқ ва иштироки фаъолонаи сокинон дар озмунҳои ҷумҳуриявӣ матраҳ шуд. Дар анҷом зикр гардид, ки ободиву шукуфоии кишвар аз ҳисси масъулият ва иштироки фаъолонаи ҳар як фарди ҷомеа вобаста буда, ҳамкории зичи мардум бо сохторҳои давлатӣ ва ҳизбӣ омили муҳими пойдории субот ва пешрафт мебошад.