ШУКӮҲИ НАВРӮЗ: ИДИ АҶДОДӢ БО РАСМУ ОИНҲОИ МИЛЛӢ ТАҶЛИЛ ГАРДИД

   Субҳи 23 марти соли 2025, Корвони Наврӯзӣ бо шукӯҳу шаҳомати хоса ба ноҳияи Ҷалолиддини Балхӣ ворид шуда, ба сокинони ин диёр омадани Наврӯзи ҷаҳонафрӯзро мужда дод. Ҷашни байналмилалии Наврӯз бо иштироки раиси ноҳия Холиқзода Рустам Ҳикматулло, намояндаи Ҳукумати Ҷумҳурии Тоҷикистон Салимзода Алиҷон Абдуҷалол, роҳбарони мақомоти ҳифзи ҳуқуқ, масъулини ҷамоатҳои шаҳраку деҳот ва сокинони сершумор дар Варзишгоҳи марказии "Панҷшер"-и ноҳияи Ҷалолиддини Балхӣ бо риояи суннату анъанаҳои миллӣ таҷлил гардид. Дар оғози чорабинӣ, роҳбарияти ноҳия аз дастовардҳои ҷамоатҳои шаҳраку деҳот, ки дар намоишгоҳ муаррифӣ шуданд, дидан намуда, бо заҳматкашон ва ҳунармандон мулоқот карданд. Дар ин намоишгоҳ ҳунарҳои мардумӣ, маҳсулоти кишоварзӣ, таомҳои миллӣ ва суннатҳои наврӯзӣ ба маърази тамошо гузошта шуданд. Ҳар як ҷамоат ва корхонаву ташкилотҳо бо ороиши дастархони идона ва пешниҳоди расму русуми хоси худ ҷашни Наврӯзро боз ҳам ранги тоза бахшид. Меҳмонон бо иштироки худ аз хӯрокҳои анъанавӣ, аз ҷумла суманак, ош, фатирмаска, шириниҳои хонагӣ ва дигар таомҳои миллӣ дидан карданд. Сипас, раиси ноҳия Холиқзода Рустам Ҳикматулло ба сухан баромада, ҳамагонро бо ҷашни байналмилалии Наврӯз табрик намуд ва таъкид кард, ки ин иди ниёгон на танҳо таҷассуми бедории табиат, балки рамзи ваҳдат, ҳамдигарфаҳмӣ ва эҳёи фарҳанги ғании мардуми тоҷик мебошад.