ТАЪМИНИ ШУҒЛИ АҲОЛӢ ВА БАЛАНДБАРДОРИИ САТҲИ ОГОҲИИ ҶАВОНОН ДАР МАРКАЗИ                                                                            ТАВАҶҶУҲ

   Санаи 4-уми апрели соли 2025 дар Ҷамоати деҳоти Навбаҳори ноҳияи Ҷалолиддини Балхӣ вохӯрии судманд бо сокинони маҳал баргузор гардид. Дар ин вохӯрӣ мудири бахши кор бо ҷавонон ва варзиши ноҳия Исматзода Саидшоҳ, сардори шуъбаи Агентии меҳнат ва шуғли аҳолии ноҳия Вализода Ҷаҳонгир ва намояндаи Ҷамоати деҳоти Навбаҳор ширкат варзиданд. Мақсад аз баргузории вохӯрӣ - баланд бардоштани сатҳи огоҳии аҳолӣ, хусусан ҷавонон, оид ба хатарҳои равандҳои ифротгароӣ ва пешгирӣ аз шомилшавӣ ба гурӯҳҳои экстремистӣ, инчунин тарғиби хизмати ҳарбӣ ҳамчун қарзи шаҳрвандии ҳар як ҷавонписари ватандӯст ва ҳалли масъалаи бо шуғл таъмин намудани аҳолии маҳаллӣ буд. Зимни суханронии худ Исматзода Саидшоҳ таъкид кард, ки ҷавонон бояд бо дарки баланди масъулиятшиносӣ ва ватандӯстӣ ба хизмат дар сафи Қувваҳои Мусаллаҳи Ҷумҳурии Тоҷикистон омода бошанд, зеро ҳифзи Ватан шарафи бузург ва қарзи муқаддаси ҳар як шаҳрванди кишвар маҳсуб меёбад. Дар навбати худ, Вализода Ҷаҳонгир оид ба имкониятҳои мавҷудаи бозори меҳнат, барномаҳои давлатии дастгирии шуғли аҳолӣ ва ҷалби шаҳрвандон, бахусус ҷавонон ба омӯзиши касбҳои техникӣ ва дарёфти ҷойи кори муносиб маълумоти муфассал пешниҳод намуд. Сокинону иштирокчиён ба масъулин саволҳои худро оид ба имкониятҳои бо кор таъмин шудан, шарту шароити хизмат дар Қувваҳои Мусаллаҳ ва роҳҳои пешгирӣ аз шомилшавии ҷавонон ба ҳаракатҳои иртиҷоӣ пешниҳод намуда, ҷавобҳои мушаххас ва муфассал дарёфт карданд. Ин гуна вохӯриҳо ҷиҳати таҳкими ҳамкории мақомоти давлатӣ бо ҷомеа, тарбияи ватандӯстии ҷавонон ва баланд бардоштани сатҳи огоҳии аҳолӣ дар самти масъалаҳои муҳими иҷтимоӣ аҳамияти калони тарбиявию маърифатӣ доранд.