ДАР НОҲИЯИ ҶАЛОЛИДДИНИ БАЛХӢ ҶАЛАСАИ ВАСЕИ ШӮРОИ ҲАМОҲАНГСОЗИИ МАҚОМОТИ                                               ҲИФЗИ ҲУҚУҚ БАРГУЗОР ШУД

            Санаи  15 октябри соли 2025 дар толори маҷлисгоҳи прокуратураи ноҳияи Ҷалолиддини Балхӣ таҳти раёсати прокурори ноҳия, мушовири адлияи дараҷаи 1 Собирзода Искандар Миралӣ ҷаласаи васеи Шӯрои ҳамоҳангсозии фаъолияти мақомоти ҳифзи ҳуқуқи ноҳия баргузор гардид. Дар ҷаласа муовини раиси ноҳия, роҳбарони бахшҳо ва шуъбаҳои мақомоти иҷроияи ҳокимияти давлатии ноҳия, раисони ҷамоатҳои шаҳраку деҳот, мудири шуъбаи маориф, директорони муассисаҳои таълимӣ, масъулини ШВКД дар ноҳия, раисони кумитаҳои маҳалла, имомхатибони масҷидҳои ҷомеъ, намояндагони ташкилоту идораҳои дахлдор ва кормандони прокуратура ширкат варзиданд.  Масъалаи асосии рӯзномаи Шӯро, сабабҳои афзоиши ҳодисаҳои худкушӣ ва сӯиқасд ба он дар соли 2024 ва нуҳ моҳи соли 2025, инчунин арзёбии сатҳи татбиқи Қонунҳои Ҷумҳурии Тоҷикистон «Дар бораи маориф» ва «Дар бораи масъулият барои таълиму тарбияи кӯдак» бахшида шуд. Дар ҷаласа ахбороти масъулини мақомоти ҳифзи ҳуқуқ ва соҳаи маориф шунида шуд. Аз ҷумла, ёрдамчии прокурори ноҳия Шафиев И.Ҷ., муфаттиши калони прокуратура Раҳимзода Ҳ.Ҳ., муовини сардори ШВКД подполковник Абосзода Ф., мудири шуъбаи маориф Шомирзозода У.М ва роҳбари шабакаи муассисаҳои КАТС Қурбонов Н.С., оид ба вазъи мавҷуда ва фаъолияти худ ҳисобот доданд. Раиси Шӯро, прокурори ноҳия Собирзода Искандар Миралӣ зимни баромадаш иброз дошт, ки барҳам хӯрдани оилаҳо, аз даст додани саломатии руҳиву равонӣ, тағйироти ногувори рафтор дар миёни ноболиғон ва ҷавонон, ятиммондан ва маҳрумият аз меҳру муҳаббати волидон, ба худкушӣ даст задани шахсони осебпазир, шурӯъ кардани истеъмоли машрубот, маводи нашъаовар ва дигар омилҳои номатлуб, аксаран аз зӯроварӣ ва хушунати беасос маншаъ мегиранд. Ӯ аҳамияти татбиқи Қарори Ҳукумати Ҷумҳурии Тоҷикистон аз 1 июли соли 2004 «Дар бораи тадбирҳои пешгирии ҳодисаҳои даст ба худкушӣ задани шаҳрвандон», Қонуни Ҷумҳурии Тоҷикистон аз 18 марти соли 2013 «Дар бораи пешгирии зӯроварӣ дар оила» ва Барномаи давлатӣ оид ба пешгирии зӯровариро махсус зикр намуд. Раиси Шӯро таъкид кард, ки мақомоти дахлдор вазифадоранд ҷиҳати пешгирии ҳуқуқвайронкунӣ, бахусус байни наврасону ҷавонон, чораҳои муассир андешанд. Ҳамзамон, зарурати тақвияти ҳамкории сохторҳои ҳифзи ҳуқуқ бо ниҳодҳои иҷтимоӣ барои таъмини ҳуқуқи кӯдакон ва фароҳамсозии муҳити бехатару солим таъкид гардид. Бо натиҷагирии масъалаҳои ҷойдошта, аз ҷониби раис ва аъзои Шӯро, қарорҳои дахлдор қабул, шахсони масъул вазифадор ва кори ҷаласа ба анҷом расид.