БАРРАСИИ МАСОИЛИ МУБРАМИ ИҶТИМОӢ

   2 майи соли равон бо мақсади баланд бардоштани сатҳи огоҳии ҳуқуқии аҳолӣ ва таъмини риояи қонунҳои амалкунанда дар деҳаи Талхачашмаи Ҷамоати деҳоти Ҳалеварди ноҳияи Ҷалолиддини Балхӣ вохӯрии иттилоотиву фаҳмондадиҳӣ баргузор шуд. Дар ин вохӯрӣ муфаттиши калони прокуратураи ноҳия Исматзода Амирҳамза Шамсулло, раиси Ҷамоати деҳоти Ҳалевард Имомзода Адолат ва сокинони маҳаллӣ ширкат варзиданд.

Дар ҷараёни вохӯрӣ масъалаҳои мубрами рӯз, аз ҷумла истифодаи сарфакорона ва пешгирии дуздии неруи барқ, танзими ҷашну маросим, инчунин хатарҳои шомилшавии ҷавонон ба гурӯҳҳои ифротгароиву террористӣ мавриди баррасӣ қарор гирифтанд.

Муфаттиши калони прокуратура Исматзода Амирҳамза зимни баромади худ таъкид кард, ки мувофиқи қонунгузории амалкунандаи Ҷумҳурии Тоҷикистон, ҳолатҳои дуздии неруи барқ на танҳо зарари иқтисодӣ мерасонанд, балки ҷинояти ҷазоёбанда ба ҳисоб мераванд.

Ӯ даъват ба амал овард, ки ҳар як шаҳрванд бояд масъулиятшинос бошад ва дар истифодаи захираҳои энергетикӣ сарфакорона рафтор кунад. Раиси ҷамоат Имомзода Адолат аз саҳми мақомоти маҳаллӣ дар баргузории чунин чорабиниҳо ёдовар шуда, изҳор дошт, ки корҳои фаҳмондадиҳӣ ва роҳандозии ташаббусҳои маърифатӣ барои таъмини суботу амният ва беҳбудии ҳаёти иҷтимоӣ аҳамияти махсус доранд.

Сокинон бо таваҷҷуҳ ба масъалаҳои баррасишуда гӯш доданд ва бархе аз онҳо дар қисмати пурсишу посух саволҳои марбут ба қонунгузорӣ, истифодаи қувваи барқ ва танзими маъракаҳоро пешниҳод намуданд.

Дар интиҳои вохӯрӣ иштирокчиён бо тавсияҳои муфид ва маводи иттилоотӣ таъмин шуданд. Қарор аст, ки чунин мулоқотҳо дар дигар деҳаҳои ҷамоат низ баргузор гарданд.