ОҒОЗИ МОҲВОРАИ ҶАВОНОН ТАҲТИ УНВОНИ "ҶАВОНОН БО ПЕШВОИ МИЛЛАТ - БА СӮИ ФАРДОИ ДУРАХШОН"

      Дар Боғи фарҳангу фароғатии ноҳияи Ҷалолиддини Балхӣ бо рӯҳияи баланд ва фазои тантанавӣ, чорабинии муҳим ва пурмазмун - қабули сарбозони шуҷои Ватан баргузор гардид. Ин чорабинӣ оғози расмии моҳвораи ҷумҳуриявии ҷавонон ба ҳисоб меравад, ки соли ҷорӣ таҳти унвони «Ҷавонон бо Пешвои миллат - ба сӯи фардои дурахшон» доир мегардад.

 Дар чорабинӣ намояндагони мақомоти иҷроияи ҳокимияти давлатии ноҳия, роҳбарони ташкилотҳои ҷамъиятӣ, ҷавонони фаъол, волидайни сарбозон ва сокинони маҳаллӣ иштирок намуданд. Чорабинӣ бо суханони ифтитоҳии мудири бахши кор бо ҷавонон ва варзиши ноҳия ифтитоҳ гардид. Дар суханрониҳо таъкид шуд, ки хизмат дар сафи Қувваҳои Мусаллаҳи Ҷумҳурии Тоҷикистон мактаби мардонагӣ, садоқат ва ватандӯстӣ барои ҳар ҷавонмарди кишвар ба ҳисоб меравад.

 Ҳамзамон зикр гардид, ки ҷавонон имрӯз дар сиёсати пешгирифтаи Пешвои муаззами миллат муҳтарам Эмомалӣ Раҳмон мавқеи муҳимро ишғол мекунанд ва кафили суботи ояндаи давлату миллат мебошанд. Қабули сарбозон бо анвои рамзии миллӣ, бардоштани парчам ва нидоҳои шукргузорӣ аз сулҳу амният сурат гирифт.

 Сарбозон дар назди ҷамъомадагон савганд ёд карданд, ки содиқона ба халқу Ватан хизмат менамоянд ва барои ҳифзи истиқлол, тамомияти арзӣ ва осоиши ҷомеа неруи ҷавонии худро равона месозанд. Дар идомаи чорабинӣ барномаи фарҳангии хотирмон, ки аз сурудҳои ватандӯстона ва шеъру таронаҳои пурмазмун иборат буд, манзури иштирокчиён гардонида шуд.

 Дар ин рӯз аз тарафи бахши кор бо ҷавонон ва варзиш ба сарбозон Сипоснома ва туҳфаҳои хотиравӣ тақдим карда шуд. Моҳвораи ҷавонон, ки ҳамасола дар доираи нақшаҳои Вазорати фарҳанги кишвар ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон амалӣ мегардад, имконият фароҳам меорад, то нақши ҷавонон дар ҳаёти ҷомеа боз ҳам бештар намоён гардад ва онҳо бо рӯҳияи баланди миллӣ, зиракии сиёсӣ ва нигоҳи созанда барои рушди давлат саҳмгузор бошанд.