ТАЪКИДИ ОМОДАГИИ ҶИДДӢ БА ДАЪВАТИ ТИРАМОҲӢ

      Рӯзи 7-уми июли соли 2025 дар толори мақомоти иҷроияи ҳокимияти давлатии ноҳияи Ҷалолиддини Балхӣ зимни ҷаласаи назоратии раиси ноҳия Ситоди ноҳиявӣ оид ба омодагӣ ба даъвати тирамоҳии наваскарон ба Қувваҳои Мусаллаҳи Ҷумҳурии Тоҷикистон низ баргузор гардид.

Ин ҷаласа таҳти раёсати раиси ноҳия Холиқзода Рустам Ҳикматулло доир шуда, дар он раисони ҷамоатҳои шаҳрак ва деҳот, масъулони комиссариати ҳарбии ноҳия ва дигар шахсони дахлдор иштирок доштанд. Раиси ноҳия дар ҷараёни ҷаласа таъкид кард, ки даъвати наваскарон ба сафи Қувваҳои Мусаллаҳ на танҳо як кори маъмурӣ, балки як иқдоми муҳимми сиёсиву тарбиявӣ ба шумор меравад. Ӯ қайд намуд, ки барои ба таври саривақт ва пурра иҷро кардани нақшаи даъват, ҷалби фаъоли ҷавонон ба хизмати ҳарбӣ, ташкили корҳои тарғиботиву фаҳмондадиҳӣ ва тарбияи ҳисси баланди ватандӯстӣ миёни ҷавонон, масъулин бояд бо ҷиддият ва масъулияти баланд кор баранд. Ҳамзамон, раиси ноҳия ба муҳим будани иҷрои бетаъхири қарорҳои марбут ба даъвати тирамоҳӣ, ки аз ҷониби раиси вилояти Хатлон, муҳтарам Давлаталӣ Саид ба тасвиб расидаанд, ишора кард.

Холиқзода Рустам Ҳикматулло таъкид намуд, ки бояд масъулин тамоми имкониятҳо ва захираҳои мавҷударо ба кор баранд, то ки нақшаи даъвати тирамоҳӣ бо масъулияти баланд ва дар муҳлати муқарраргардида иҷро гардад.

Дар анҷоми ҷаласа аз номи вазири мудофиаи Ҷумҳурии Тоҷикистон, генерал-лейтенант Собирзода Эмомалӣ ба раиси ноҳия барои иҷрои босифат ва саривақтии нақшаи даъвати баҳории соли ҷорӣ Сипоснома тақдим карда шуд, ки ин қадрдонӣ нишони эътирофи заҳматҳои мақомоти ноҳия дар самти ҷалби ҷавонон ба хизмати ҳарбӣ мебошад.