ТАВАҶҶУҲИ РОҲБАРИЯТИ НОҲИЯ БА ЧИНИШИ ПАХТА ВА ЧАРОҒОНКУНИИ ДЕҲОТ

         Бо мақсади амалӣ шудани супоришҳои раиси ноҳияи Ҷалолиддини Балхӣ, тақвияти корҳои саҳроӣ ва беҳдошти сатҳи хизматрасониҳои инфрасохторӣ дар деҳот, 7 августи соли ҷорӣ дар Ҷамоати деҳоти Золи Зари ноҳияи Ҷалолиддини Балхӣ вохӯрии судманд бо роҳбарон ва масъулини хоҷагиҳои деҳқонӣ баргузор гардид. Дар вохӯрӣ муовини раиси ноҳия Қурбонзода Қурбоналӣ ширкат варзида, доир ба масъалаҳои муҳими мавсими кишоварзӣ, аз ҷумла ҷараёни ҷамъоварии ҳосили пахта, корҳои ободонӣ ва раванди чароғонкунии маҳалҳои аҳолинишин суханронӣ намуд. Зимни баромади худ Қурбонзода Қурбоналӣ иброз дошт, ки мавсими чиниши пахта яке аз марҳилаҳои масъулиятноки соҳаи кишоварзӣ ба шумор рафта, дар ин самт бояд бо сафарбар сохтани тамоми захираҳо ва истифодаи имкониятҳои мавҷуда натиҷаҳои назаррас ба даст оварда шаванд. Ҳамзамон, таъкид гардид, ки роҳбарони хоҷагиҳои деҳқонӣ вазифадоранд дар баробари корҳои саҳроӣ, ба масоили ободонӣ, тозаю озода нигоҳ доштани муҳити зист ва беҳтарсозии инфрасохтори деҳот, аз ҷумла насби чароғҳои кӯчавӣ, таваҷҷуҳи хосса зоҳир намоянд. Зеро маҳз ободии деҳа ва муҳити зисти солим яке аз омилҳои муҳими баланд бардоштани сатҳи зиндагии сокинон мебошад. Масъулин дар навбати худ оид ба вазъи ҷорӣ дар хоҷагиҳои худ, омодагиҳо ба мавсими чиниши пахта ва рафти корҳои ободониву чароғонкунӣ маълумот пешниҳод намуда, иброз доштанд, ки бо дарки масъулияти иҷтимоӣ ҷиҳати иҷрои вазифаҳои ба зиммадошта тадбирҳои амалӣ меандешанд. Дар поёни вохӯрӣ, муовини раиси ноҳия таъкид намуд, ки мақомоти иҷроияи ҳокимияти давлатии ноҳия барои ҳамкории зич бо хоҷагиҳои деҳқонӣ омода буда, иҷрои саривақтии нақшаҳо ва таҳкими ҳамкориро аз вазифаҳои афзалиятнок мешуморад.