ШАНБЕГИИ ДАСТАҶАМЪОНА ДАР НОҲИЯИ ҶАЛОЛИДДИНИ БАЛХӢ

         Субҳи имрӯз, 9 август дар ноҳияи Ҷалолиддини Балхӣ иқдоми васеи ҳашари дастаҷамъона баргузор гардид. Ин тозакориҳо бо супориши раиси ноҳия Холиқзода Рустам Ҳикматулло ва бо мақсади нигоҳдории зебоиву ободии муҳити зист, инчунин татбиқи дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳандозӣ шуд.  Дар ин шанбегӣ намояндагони тамоми ташкилоту муассисаҳо, корхонаҳо, ҷамоатҳои шаҳраку деҳот, кормандони бахшҳои гуногун, сокинони маҳаллӣ ва волонтёрони бахши кор бо ҷавонон ва варзиши ноҳия фаъолона ширкат варзиданд. Иштирокчиён дар тӯли рӯз корҳои тозакорӣ ва ободкориро дар маркази ноҳия, шоҳроҳҳои асосӣ, кӯчаву роҳравҳои пиёдагарди ҳамшафат ва ҷӯйборҳо анҷом доданд. Ҳамзамон, корҳои обёрии заминҳо, дарахтон, гулу буттаҳо ва тоза кардани партов аз роҳравҳо ба таври густурда амалӣ гардид. Мақомоти иҷроияи ҳокимияти давлатии ноҳия таъкид намуданд, ки ободу зебо ва ҳамеша тозаву озода нигоҳ доштани маҳалли зист аз ҷумлаи иқдомҳои муҳим ва наҷиб ба ҳисоб меравад. Ин гуна шанбегиҳо пайваста бо ташаббус ва дастгирии роҳбарияти ноҳия ташкил ва баргузор мешаванд, то муҳити зист на танҳо зебо, балки солим ва мусоид барои зиндагии мардум бошад.