"ШУКӮҲИ ИСТИҚЛОЛ" – ҶАШНИ ҲАМБАСТАГИИ МАРДУМ ДАР НОҲИЯИ ҶАЛОЛИДДИНИ БАЛХӢ

                Санаи 15 августи соли 2025 Боғи фарҳангиву фароғатии ноҳияи Ҷалолиддини Балхӣ ба саҳнаи пуршукӯҳи шодиву фараҳ мубаддал гардид. Дар ин рӯз барномаи тантанавӣ таҳти унвони «Шукӯҳи Истиқлол» баргузор шуда, садҳо нафар аз сокинони маҳаллӣ, фаъолон, намояндагони касбу кори гуногун ва меҳмонони вилоятӣ гирди ҳам омада, бо руҳияи баланди ватандӯстӣ ҷашн гирифтанд.

Чорабиниро бахши дин, танзими ҷашну маросимҳои мақомоти иҷроияи ҳокимияти давлатии ноҳия роҳандозӣ намуд. Ҳузури роҳбарияти ноҳия, кормандони соҳаҳои маорифу тандурустӣ, инчунин чеҳраҳои маъруфи фарҳангу адаб ба ин ҷашнвора рангу таъсири хоса бахшид. Фазои идона бо сурудҳои ватандӯстона ва навоҳои ифтихормандона пур аз эҳсос гардид. Баромади ҳунарманди шинохтаи кишвар Лоиқ Холов, ки бо иҷрои таронаҳои ватанӣ ҳозиринро ба эҳсоси ифтихор аз давлатдории миллӣ ҳамроҳ сохт, ҳамчун лаҳзаи хотирмону таъсирбахш дар ёди иштирокчиён нақш баст.

Дар боғ садои оҳангҳои дилнавоз ва чеҳраҳои пуртабассум шаҳодат медоданд, ки Истиқлолияти давлатии Тоҷикистон барои ҳар як фарди кишвар танҳо як воқеаи таърихӣ нест, балки рамзи худшиносӣ, сарнавишти нав ва гарави пешрафту субот аст. Чорабинӣ бо барномаи консертӣ ва рақсҳои дилошуби сокинон анҷом ёфта, то дергоҳ боқӣ мондани фазои идона дар қалби иштирокчиёнро таъмин намуд. Бо чунин тантанаҳо мардуми ноҳияи Ҷалолиддини Балхӣ бори дигар собит сохтанд, ки Истиқлолият барои онҳо бузургтарин дастоварди таърихиву сиёсӣ буда, пос доштани он вазифаи муқаддаси ҳар шаҳрванди кишвар мебошад.