"ШУКӮҲИ ИСТИҚЛОЛ" -.ҶАШНИ ҲАМБАСТАГИИ СОКИНОН ДАР НОҲИЯ

         Рӯзи 18 август дар Боғи фарҳангу фароғатии ноҳияи Ҷалолиддини Балхӣ бо иштироки васеи сокинон ва меҳмонон барномаи фарҳангиву маърифатӣ таҳти унвони “Шукӯҳи Истиқлол” баргузор гардид. Чорабинӣ бо ташаббуси Беморхонаи марказӣ ва зерсохторҳои он, Маркази дандонпизишкӣ, Маркази мубориза бо бемориҳои сил, Маркази ВНМО, Маркази тропикӣ ва Маркази пӯсту зуҳравии ноҳия роҳандозӣ шуд. Дар чорабинӣ роҳбарияти ноҳия, намояндагони корхонаву ташкилотҳо ва фаъолони ҷомеа ҳузур доштанд.

Қисмати фарҳангии чорабинӣ бо сурудҳои ватандӯстона ва баромади ҳунармандони маҳаллӣ ранг гирифт. Ҳузури сарояндаи маъруфи ҷумҳурӣ Ҷаннатулло Абдуллоев ба ин чорабинӣ шукӯҳи хос бахшид. Сурудҳои ӯ, ки саршор аз меҳру муҳаббат ба Ватан ва истиқлол мебошанд, бо кафкӯбиҳои пурҳаяҷони тамошобинон истиқбол гардиданд. Иштироки фаъолонаи сокинон нишон дод, ки чунин барномаҳо на танҳо воситаи болидахотирӣ, балки минбари баланд бардоштани маърифати мардум дар самти саломатӣ ва тақвияти ҳисси ифтихор аз дастовардҳои истиқлолият мебошанд.