КИТОБ - РАВШАНГАРИ РОҲИ МАЪРИФАТ

         Дар замони рушди технологияҳои иттилоотӣ ва шиддати иттилоърасонии шабакавӣ, боз ҳам аҳамияти китоб ҳамчун манбаи дониш, маърифат ва ахлоқи солим кам нагардида, балки рӯшантар ба назар мерасад. Бо дарки амиқи ин ҳақиқат, роҳбарияти вилояти Хатлон соли 2025-ро ҳамчун “Соли фарҳанги китобхонӣ” эълон намуд, ки ин иқдом на танҳо ҷанбаи рамзӣ, балки паёми ҷиддии фарҳангӣ ва маърифатӣ барои ҷомеаи имрӯз аст. Китоб таърихан ҳамчун рамзи дониш ва хирад шинохта шудааст.

Дар тӯли асрҳо маҳз тавассути китобҳо донишҳои бузурги башарӣ аз насл ба насл интиқол ёфтаанд. Тамаддуни тоҷик низ дар заминаи фарҳанги китобӣ рушд кардааст. Осори нобиғаҳои илму адаб - оғоз аз Абӯабдуллоҳи Рӯдакӣ то Абӯалӣ ибни Сино ва аз Саъдӣ то Бедил шаҳодат аз аҳамияти китоб ва нақши он дар ташаккули тафаккури миллӣ медиҳад. Дар шароити кунунӣ, ки ҷомеа ба иттилооти фаврӣ дастрасӣ дорад, эҳтиёҷ ба мутолиаи амиқ ва тафаккури танқидӣ беш аз ҳар вақти дигар эҳсос мешавад.

Китоб на танҳо дониш медиҳад, балки зеҳнро парвариш мекунад, ҷаҳонбинӣ месозад ва ахлоқи инсонро тарбия менамояд. Эълон шудани “Соли фарҳанги китобхонӣ” дар вилояти Хатлон як иқдоми саривақтӣ ва мутобиқ ба талаботи замон мебошад. Ин тасмим ба ҳадафи асосии Роҳбари давлат - тарғибу ташвиқи маънавиёти миллӣ, таҳкими худшиносии ҷавонон ва боло бурдани сатҳи маърифати мардум рост меояд. Чунон ки Пешвои муаззами миллат муҳтарам Эмомалӣ Раҳмон борҳо таъкид намудаанд: «Китоб чашмаи хирад аст».

Раёсати фарҳанги вилоят дар ҳамкорӣ бо муассисаҳои таҳсилоти миёна ва олӣ, китобхонаҳо, марказҳои ҷавонон ва дигар сохторҳои дахлдор ҷиҳати татбиқи ин ташаббус барномаи вижа таҳия намудаанд. Аз ҷумла, баргузории ҳафтаҳо ва моҳҳои китоб, намоишгоҳҳои китоб, озмунҳои "Китобхони беҳтарин", "Оила ва китоб", вохӯриҳо бо адибон ва муаррифии китобҳои нав аз ҷумлаи тадбирҳое мебошанд, ки дар доираи соли китобхонӣ амалӣ мешаванд. Нақши ҷавонон дар боло бурдани фарҳанги китобхонӣ муҳим аст. Дар ин замина, истифодаи самараноки китобхонаҳои электронӣ ва чопии муассисаҳои таълимӣ бояд дар меҳвари таваҷҷуҳи донишҷӯён ва хонандагон қарор гирад. Ҷалби наврасон ба китоб тавассути роҳҳои эҷодӣ, аз ҷумла театрсозӣ, бахшҳои хондани порчаҳои адабӣ, видёгузоришҳои китобӣ дар шабакаҳои иҷтимоӣ, метавонад самаранокии ташаббуси мазкурро афзун гардонад.

Китобхонӣ танҳо амали фардӣ нест, балки ҷузъи муҳими фарҳанги миллӣ мебошад. Ҳар ҷомеае, ки ба китоб арҷ мегузорад, ба илм, адаб, ахлоқ ва ҳувияти худ арҷ мегузорад. Пас, боло бурдани фарҳанги китобхонӣ, дар асл, боло бурдани сатҳи зиндагии маънавии ҷомеа мебошад. Имрӯз, ки миллати мо ба сӯйи ҷомеаи мутараққӣ қадам мегузорад, бояд китобро ҳамчун раҳнамои маърифат ва тафаккури солим бештар гиромӣ дорад. "Соли фарҳанги китобхонӣ" фурсати нодирест, ки онро бояд ба василаи таҳкими робитаи инсон бо китоб ва бедории маънавии ҷомеа табдил дод. Лутфинисо АЗИЗОВА, методисти калони Китобхонаи марказии ноҳияи Ҷалолиддини Балхӣ - "Аълочии фарҳанги Ҷумҳурии Тоҷикистон"