ПАХТА - ДАСТРАНҶИ ДЕҲҚОН ВА АМНИЯТАШ ВАЗИФАИ ҲАМАГОН!

         Бо фаро расидани мавсими ҷамъоварии ҳосили пахта масъалаи таъмини амнияти он аз оташсӯзӣ аҳамияти хоса мегирад. Ҳамасола кормандони Қисми мустақили 28-уми ҳарбикунонидашудаи Хадамоти давлатии оташнишонии ноҳияи Ҷалолиддини Балхӣ пеш аз оғози мавсим корҳои фаҳмондадиҳию пешгириро дар нуқтаҳои қабулу корхонаҳои коркарди пахта ба роҳ мемонанд. Ҳадаф аз ин тадбирҳо баланд бардоштани сатҳи масъулиятшиносии роҳбарони хоҷагиҳои деҳқонӣ, иҷоракорон, механизаторону ронандагон ва масъулони корхонаҳо дар самти риояи қоидаҳои зиддисӯхторӣ мебошад.

      Тибқи нақшаи чорабиниҳои пешгирикунанда, 17 сентябри соли ҷорӣ вохӯриҳои амалӣ дар корхонаҳои пахтаи ҶДММ «Элит Котон» ва ҶДММ «Рушди Хатлон», инчунин дар нуқтаҳои қабули пахта ва як қатор хоҷагиҳои деҳқонии ҷамоатҳои шаҳраку деҳоти ноҳия доир гардид. Дар ин мулоқотҳо сардори қисм, майори хизмати дохилӣ Носир Сатторзода, бо ишора ба омилҳои асосии сар задани оташ аз шарораи гулхану гӯгирд ва сигори нопурра хомӯшшуда то беэҳтиётӣ ҳангоми истифодаи техника, таъкид намуд, ки ҳар як бетафовутӣ метавонад боиси талафоти ҷиддӣ гардад. Ба масъулони соҳа супориш дода шуд, ки дар наздикии ҷойҳои нигоҳдории пахта оташ афрӯхтан қатъиян манъ буда, борҳои пахта дар мошин ё трактор ҳатман бо матои махсуси обногузар пӯшонида шаванд.

Техникаи ҷалбшуда ба ҷамъоварӣ ва интиқоли пахта бояд бо шарорахомӯшкунак, оташхомӯшкунаки тамғаи ОП-5 ва бел таъмин бошад. Илова бар ин, майдонҳои хушккунии пахта бояд асфалтпӯш ё ҳадди ақал бо қабати лойи ғафс рӯйпӯш карда шаванд. Қоидаҳои ҷойгиршавии техника низ баён гардид: истгоҳҳои трактор, мошинаҳои пахтачинӣ, нуқтаҳои таъмир ва равғанмолӣ бояд на камтар аз 100 метр дуртар аз хирман ҷой дошта бошанд. Дар сурати сар задани оташ дар бордони мошини пахтачинӣ, зарур аст, ки пахта фавран дар макони бехавф холӣ карда шуда, чораҳои фаврӣ барои хомӯш кардани он андешида шаванд.

      Дар ҷараёни вохӯриҳо инчунин таъкид шуд, ки корхонаҳои пахтатозакунӣ ва нуқтаҳои қабули пахта бояд ҳатман ба обтаъминкунӣ омода бошанд. Дар ҷойҳое, ки то 150 метр гидранти оташнишонӣ вуҷуд надорад, сохтори махсуси ҳавзҳои об ҳатмист. Агар ҷӯй ё дарё дар ҳамин масофа бошад, гузаргоҳҳо ба онҳо бунёд карда шаванд. Инчунин, корхонаҳо бояд бо таҷҳизоти оташнишонӣ, аз ҷумла мошинҳои зиддисӯхторӣ, насосҳо, мотопомпаҳо ва дигар лавозимоти зарурӣ таъмин гарданд. Бо назардошти ин ҳама, масъулони Хадамоти давлатии оташнишонӣ хотиррасон карданд, ки пешгирӣ аз сӯхтор на танҳо амнияти молу маҳсулот, балки ҷони одамонро низ ҳифз менамояд. Аз ин рӯ, риояи қатъии қоидаҳои зиддисӯхторӣ дар мавсими ҳассоси ҷамъоварии пахта шарти асосии ҳифзи дастранҷи меҳнатии деҳқонон ба шумор меравад.