ДАСТОВАРДҲО ВА ФАЪОЛИЯТИ МАКТАБИ ВАРЗИШИИ НОҲИЯИ ҶАЛОЛИДДИНИ БАЛХӢ.

     Варзиш яке аз самтҳои афзалиятноки сиёсати иҷтимоии давлату ҳукумат ба ҳисоб рафта, нақш ва ҷойгоҳи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушди тарбияи ҷисмонӣ ва варзиш, ки ҳамчун ифодакунандаи сиёсати мантиқии давлату ҳукумат ба таҳкими ҳаёти иҷтимоии ҷомеа, солимии миллат, ташвиқу таблиғи тарзи ҳаёти солим, таҳкими дӯстӣ ва тарғиби идеяи миллати солим мавқеи баландро соҳиб гардидааст. Вобаста ба гуфтаҳои боло дар Муассисаи давлатии мактаби варзишии ноҳияи Ҷалолиддини Балхӣ имрӯзҳо 20 нафар мураббӣ кор ва фаъолият менамоянд. Ин мактаби варзишӣ аз рӯйи 7 намуди варзиш волейбол, футбол, гӯштини миллӣ, гӯштини тарзи ҷудо, варзиши сабук, шашка шоҳмот фаъолият намуда, дар мусобиқаҳои ноҳиявӣ, вилоятӣ, ҷумҳуриявӣ ва берун аз он иштирок мекунанд. Аз рӯйи таҳлил маълум гардид, ки варзишгарони муассисаи мазкур дар 28 мусобиқаи сатҳи вилоятӣ иштирок намуда, аз он 113 адад медал ба даст овардаанд, ки аз ин 51 медали тилло, 40 медали нуқра ва 22 медали биринҷӣ мебошанд. Дар 16 мусобиқаи ҷумҳуриявӣ бошад, иштироки худро таъмин намуда, сазовори 65 адад медал гардидаанд, ки ин миқдор 23-то тилло, 20-то нуқра ва 22 - тои он медали биринҷӣ аст. Инчунин варзишгарони ноҳия дар 9 мусобиқаи Чемпионати Ҷумҳурии Тоҷикистон низ ширкат варзида 20-медал: 4-то тилло, 7-то нуқра, 9-то биринҷӣ ба даст овардаанд, ки нисбат ба 11 моҳи соли 2022, 7-медал зиёд мебошад. Дар ин замина, Пирхуҷаи Ҷурабек дар мусобиқаи ҷумҳуриявӣ оид ба «Гӯштингирӣ» ҷойи якум, Асоев Абӯалӣ дар мусобиқаи ҷумҳуриявии гӯштини миллӣ ҷойи дуюм ва Қадамов Асҳобиддин дар мусобиқаи ҷумҳуриявӣ дар гӯштини миллӣ ҷойи сеюмро ишғол намуданд. 

ТАҶЛИЛИ РӮЗИ ПАРЧАМИ ДАВЛАТИИ ҶУМҲУРИИ ТОҶИКИСТОН ДАРНОҲИЯИ ҶАЛОЛИДДИНИ БАЛХӢ

    Бахшида ба иди Рӯзи Парчами давлатии Ҷумҳурии Тоҷикистон бо шукуҳу шаҳомати хоса чорабиниҳои идона гузаронида шуд. Имрӯз, 23 ноябри соли 2023 сокинону ҷавонон ва кормандони корхонаву ташкилотҳои ноҳия ба даст Парчам ва шиору овезаҳо гирифта, аз маркази ноҳия то назди майдони Парчами давлатии Ҷумҳурии Тоҷикистон дар ноҳияи Ҷалолиддини Балхӣ роҳпаймоӣ намуданд. Инчунин, дар роҳпаймоӣ раиси ноҳия муҳтарам Холмурод Раҳмон, муовинон, роҳбари дастгоҳи раиси ноҳия, кормандони Мақомоти иҷроияи ҳокимияти давлатии ноҳия, роҳбарони сохторҳои қудратӣ, роҳбарони корхонаву ташкилотҳо, раисони ҷамоату шаҳраки деҳоти ноҳия ва собиқадорону фаъолон иштирок намуданд. Сипас, раиси ноҳияи Ҷалолиддини Балхӣ муҳтарам Холмурод Раҳмон ҳамчун рамзи эҳтиром ба муқаддасоти миллӣ дар назди Парчами давлатӣ гулчанбар гузошт. Баъдан дар Қасри фарҳанги ба номи Ҷалолиддини Балхӣ бахшида ба Рӯзи Парчами давлатии Ҷумҳурии Тоҷикистон маҷлиси тантанавӣ баргузор гардид. Зимни сухани табрикиаш раиси ноҳия муҳтарам Холмурод Раҳмон кулли сокинони ноҳияро табрик намуда, зикр дошт, ки Парчами давлатии мо таҷассуми ҳастии миллати соҳибдавлат ва тамаддунофари тоҷик, иттиҳоду сарҷамъии он ба шумор меравад.

                            МАСЪУЛИЯТШИНОСӢ - БЕҲБУДИИ ҲАЁТИ ФАРЗАНДОН

         Дар асоси нақша-чорабиниҳои Мақомоти иҷроияи ҳокимияти давлатии ноҳияи Ҷалолиддини Балхӣ дар самти пешгирии омилҳои номатлуби иҷтимоӣ миёни ноболиғону ҷавонон, зӯроварӣ, хариду фурӯши инсон, рафти иҷрои қонунҳои Қонуни Ҷумҳурии Тоҷикистон «Дар бораи масъуляти падару модар дар таълиму тарбияи фарзанд» «Дар бораи танзими анъана ва ҷашну маросим дар Ҷумҳурии Тоҷикистон» ва «Дар бораи озодии виҷдон ва иттиҳодияҳои динӣ» бо иштироки Барно Саидова - сармутахассис - котиби комиссия оид ба ҳуқуқи кӯдак, Ҷавоҳир Риоева - сармутахассиси бахши кор бо занон ва оила, Хайринисо Қаҳорова-сармутахассиси бахши кор бо ҷавонон ва варзиши ноҳия дар муассисаҳои таҳсилоти миёнаи умумии ҷамоатҳои деҳоти Ҳалевард, Золи Зар ва Навоӣ байни волидайн, омӯзгорон ва хонандагон вохӯрии судманд доир карда шуд. 

                               ЗАБОНИ ТОҶИКӢ - МОЯИ ИФТИХОРИ МИЛЛАТ

    Аз овони хурдӣ то давраи пиронсолӣ ҳаёти инсон бо забон алоқаманд мебошад. Тифл сухан гуфта наметавонад, вале ӯ садои аллаи модар, инчунин нақли афсонаи бибияшро дарк намуда, гӯш медиҳад. Ҳама корҳое, ки мову шумо дар рӯйи замин анҷом медиҳем, ин ҳама бо воситаи забон ба вуқуъ мепайвандад. Забон воситаи муоширати инсон дар ҷамеа аст. Дар баробари ташаккулёбии ҷомеа забон низ ташаккул меёбад. Бе донистани забон, илм, техника, касбу ҳунарҳо ва умуман, пешрафти фарҳанги башарият ғайри имкон аст. Дар баробари донистани забон, ҳар як соҳибзабон бояд маънои луғавии онро хуб дарк намуда, ҳангоми истифодабарӣ қоидаҳои имлои забони давлатиро риоя намояд. Воқеан ҳам, бузургии забон ҳамин аст, ки мо имрӯз халқи тоҷик забони бузурги худро дорем ва олимону мутуфаккирони машҳурамон ба монанди Абуабдуллоҳи Рӯдакӣ, Абулқосими Фирдавсӣ, Ҳофизи Шерозӣ ва Камоли Хуҷандӣ дар эҷодиёташон нишон додаанд, ки миллату забони мо фарҳангӣ буда, дар ҳама ҳолат ҳувияти илмиву адабии худро нигаҳ медорад. 

ЧОРАБИНӢБАХШИДАБА«РӮЗИРӮДАКӢ» «Забони шеъри Рӯдакӣ забони меъёр ва забони адабии мост, ки онро бо гузашти дувоздаҳ аср мо имрӯз низ истифода мебарем ва бо шеъри Рӯдакӣ ҳар рӯз сухан мегӯем». Эмомалӣ Раҳмон.

    Рӯзи 20 сентябри соли 2023 дар толори китобхонаи марказии ноҳияи Ҷалолиддини Балхӣ бо иштироки мудири бахши фарҳанги ноҳия Латифзода Насиба, мутахассиси пешбари бахши фарҳанг Гулмурод Кабиров, методисти китобхонаи марказӣ Лутфинисо Азизова, китобдорони филиалҳо, хонандагони китобхонаи марказӣ ва бачагона чорабинии фарҳангӣ - маърифатӣ бахшида ба «Рӯзи Рӯдакӣ» таҳти унвони «Ҷаҳон аз Рӯдакӣ мешавад сар» баргузор гардид. Инчунин дар толор гӯшаи намоиши китобӣ, маълумотномаҳои библиографӣ бо номи «Устод Рӯдакӣ - қофиласолори шеъри ҳикматӣ» ташкил намуда, ба марази умум гузошта шуда буд. Зикр гардид, ки устод Рӯдакӣ бо хизматҳои бузургаш ба ин мақоми таърихӣ расидааст. Рӯдакӣ дар таърихи фарҳанги халқи тоҷик аввалин суханваре аст, ки таҷрибаҳо ва муваффақиятҳои гузаштаи худро дар соҳаи адабиёти форсӣ ҷамъбаст кардааст. Дар замони имрӯз баҳра бардоштан аз ҳикматҳои Рӯдакӣ ва онро дар зиндагӣ мавриди истифода қарор додан аҳамияти бештар пайдо кардааст. Онҳо роҳнамои омӯзиши ҳаёт ва одамият мебошанд, ки ҷавононро ба омӯхтани илму дониш, нигоҳи тоза, ватандӯстию худшиносӣ, некию фазилат, дӯстию бародарӣ ва накӯкорӣ раҳнамоӣ карда, паёми ахлоқии миллатро тавассути забони ноби тоҷикӣ аз насл ба насл интиқол медиҳанд. Сипас, китобдорони филиалҳо оид ба маънавиёт суханронӣ намуда, хонандагони китобхонаи марказӣ ва бачагонаи ноҳия порчаҳои назмиву насрӣ аз эҷодиёти шоир қироат намуданд.

Навиди Балх

                                ҲИФЗИ ВАТАН РИСОЛАТИ БУЗУРГИ ФАРЗАНДИСТ

          «Ватанро дӯст доштан, аз он ифтихор кардан, барои ҳимояи он омода будан, ба қадри сулҳу субот, осудагиву Ваҳдат ва Истиқлолият расидан, шукронаи соҳибватаниву соҳибдавлатиро ба ҷо овардан аз ҷумлаи арзишҳое мебошанд, ки ҷавонони мо бояд онҳоро дастури зиндагии ҳаррӯзаи худ қарор диҳанд ва итминон дошта бошанд, ки танҳо дар ҳамин сурат мо метавонем кишвари воқеан ободу пешрафта ва тавоно бунёд намоем». Эмомалӣ РАҲМОН Ташкилоти ҷамъиятии мададгори мудофиаи Ҷумҳурии Тоҷикистон дар ноҳияи Ҷалолиддини Балхӣ дорои заминаи мустаҳками техникӣ ва ҷомеаи меҳнатии корозмуда буда, дар сафи худ садҳо ҳазор аъзои ихтиёриро муттаҳид менамояд. Тибқи иттилои роҳбари Ташкилоти ҷамъиятии мададгори мудофиаи ноҳия Ибодуллоҳ Набиев айни ҳол дар ташкилоти болозикр аз ҷамоатҳои шаҳраку деҳоти ноҳия чор гурӯҳ иборат аз 104 нафар курси ронандагӣ таҳсил намуда истодаанд, ки ба онҳо омӯзгори пуртаҷриба амаки Муҳиддин Одинаев дарс гуфта, қоидаҳои ҳаракат дар роҳро меомӯзонад. Онҳо пас аз хатм ва ба даст гирифтани шаҳодатномаи ронандагӣ ба сафи Қувваҳои Мусаллаҳи Ҷумҳурии Тоҷикистон сафарбар мегарданд.

 МИЗИ МУДАВВАР БАХШИДА БА «16 РӮЗИ ФАЪОЛНОКӢ БАР ЗИДДИ ЗӮРОВАРИИ ГЕНДЕРӢ»

   Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар аксари вохӯрию суҳбатҳояшон оид ба бунёди оилаи солиму устувор, тарбияи фарзандони солеҳ, таълиму тарбияи наслҳои имрӯзу оянда дар рӯҳияи ватандӯстӣ, баҳри пойдорию устувории Истиқлоли давлатӣ ва Ваҳдати миллӣ таваҷҷуҳи хосса зоҳир намуда, оилаи солиму фарзандони солеҳро асоси давлату миллати устувору солим арзёбӣ менамоянд. Дар ин замина имрӯз 26 июли соли 2023 дар толори Маркази дастгирии занони ташкилоти ҷамъиятии «Оксана» дар ноҳияи Ҷалолиддини Балхӣ бо иштироки роҳбари лоиҳа Муаззама Усмонова, ахборотчии ташкилоти ҷамъиятии «Оксана» Саодат Алаёрова, намояндаи Мақомоти иҷроияи ҳокимияти давлатии ноҳия Моҳсанам Аҷикова, кормандони ҷамоатҳои шаҳраку деҳоти ноҳия, мушовири шуъбаи маориф, ёвари сардори ШВКД, намояндагони ҲХДТ ва раисони маҳалла мизи мудаввар бахшида ба «16 рӯзи фаъолнокӣ бар зидди зӯроварии гендерӣ» баргузор гардид. 

БАРГУЗОРИИ ФЕСТИВАЛ-ОЗМУНИ ҶУМҲУРИЯВИИ ТЕЛЕВИЗОНИИ ЭҶОДИЁТИ ХАЛҚ «АНДАЛЕБ – 2023»

         ДАР НОҲИЯИ ҶАЛОЛИДДИНИ БАЛХӢ Имрӯз 14 июли соли 2023, бо мақсади иҷрои Амри Президенти Ҷумҳурии Тоҷикистон аз 3 январи соли 2023, АП-318, оид ба баргузории фестивал, намоиш, ид, озмунҳои анъана ва ҳунарҳои мардумӣ ва ҷашну солгардҳо дар Ҷумҳурии Тоҷикистон барои соли 2023, дар Чойхонаи ба номи "Шамсулло"-и ноҳияи Ҷалолиддини Балхӣ бо иштироки намояндагони раёсати фарҳанги вилояти Хатлон Боймуродов Саидмурод, Ризоев Муҳаммад, муовини раиси ноҳия оид ба соҳаи иҷтимоӣ Сангализода Қумриниссо ва дигар масъулин доир гардид. 

 ДАВРИ ДУЮМИ ОЗМУНИ ҶУМҲУРИЯВИИ «ТОҶИКОН»-ОИНАИ ТАЪРИХИ   МИЛЛАТ» Санаи 6 июни соли 2023

    Дар толори муассисаи таҳсилоти миёнаи умумии №2-и ноҳияи Ҷалолиддини Балхӣ даври дуюми озмуни ҷумҳуриявии «Тоҷикон»-оинаи таърихи миллат» бо иштироки аъзои ҳакамон Саодат Алаёрова, намояндаи Мақомоти иҷроияи ҳокимияти давлатии ноҳия Зуҳро Атабоева, мудири бахши кор бо занон ва оила Ҷаъфарзода Фарзона, мудири бахши кор бо ҷавонон ва варзиши ноҳия Қурбонзода Хуршед ва директории китобхонаи марказӣ Наргис Салимова баргузор гардид. Дар озмуни мазкур хонандагони синфҳои 5-11-и муассисаҳои таҳсилоти миёнаи умумӣ ва кормандони баъзе ташкилоту муассисаҳо иштирок намуда, ғолибон ба даври сеюми вилоятӣ роҳхат гирифтанд. 

                                    «ҲАМНИШИНЕ НЕСТ БЕҲТАР АЗ КИТОБ»

 Тибқи нақша-чорабиниҳои Ҳукумати Ҷумҳурии Тоҷикистон ва раёсати фарҳанги вилояти Хатлон дар толори китобхонаи марказии ноҳияи Ҷалолиддини Балхӣ санаи 5 июни соли равон библиомарафон таҳти унвони «Ҳамнишине нест беҳтар аз китоб» гузаронида шуд. Дар чорабинии мазкур намояндаи Мақомоти иҷроияи ҳокимияти давлатии ноҳия Зуҳро Атабоева, мудири бахши фарҳанг Латифзода Насиба, директори китобхонаи марказӣ Наргис Салимова, сармуҳаррири рӯзномаи ноҳиявии «Навиди Балх» Ибодуллоҳ Одиназода, аъзои китобхона ва филиалҳои ҷамоатҳои шаҳраку деҳоти ноҳия иштирок доштанд. Баргузор намудани чунин озмунҳо барои ҷалби кӯдакону наврасон ба китобхонӣ, баланд бардоштани савияи дониш, завқи бадеӣ ва ҳисси ватандӯстиву хештаншиносии онҳо мусоидат менамояд. Дар фарҷом иштирокчиёни фаъол аз тарафи директори китобхонаи марказии ноҳия Наргис Салимова бо Сипоснома қадрдонӣ карда шуданд.