НАВРӮЗИ БАЙНАЛМИЛАЛӢ: ҲАМОВОЗИИ ҲУНАР ВА МЕРОСИ МИЛЛӢ ДАР ҶАМОАТИ ДЕҲОТИ                                                                       НАВБАҲОР

         24 марти соли 2025, дар Ҷамоати деҳоти Навбаҳори ноҳияи Ҷалолиддини Балхӣ бо иштироки муовини раиси ноҳия Қурбонзода Қурбоналӣ, намояндагони ҷамоати зикршуда, сокинони маҳалла ва дигар шахсони масъул ҷашни Наврӯзи байналмилалӣ бо шукӯҳу шаҳомати хос таҷлил гардид. Иди баҳор ва наврӯз бо намоиши ҳунарҳои мардумӣ ва анъанаҳои миллӣ оғоз ёфт. Масъулин сараввал аз намоишгоҳи ҳунармандон ва хӯрокҳои миллӣ, аз ҷумла рамзҳои Наврӯз – Ҳафтсин ва Ҳафтшин дидан намуданд.

 Дар ин намоишгоҳ ҳунармандон маҳсули дастони худро ба маърази тамошо гузошта, хӯрокҳои анъанавӣ, монанди суманак, ош, ширбиринҷ ва шириниҳои миллӣ пешкаш карданд. Сипас, муовини раиси ноҳия Қурбонзода Қурбоналӣ паёми табрикотии раиси ноҳияи Ҷалолиддини Балхӣ Холиқзода Рустам Ҳикматуллоро ба сокинони ҷамоат расонида, аҳаммияти Наврӯзро ҳамчун ҷашни ваҳдат, ҳамдигарфаҳмӣ ва эҳёи суннатҳои миллӣ таъкид кард.