РӮЙДОДИ ТАЪРИХӢ: ДӮСТИИ ХАЛҚҲОИ ТОҶИКИСТОН, ҚИРҒИЗИСТОН ВА ӮЗБЕКИСТОН БОЗ ҲАМ                                                               ҚАВИТАР ШУД.

      31 марти соли 2025, як рӯйдоди таърихӣ барои Тоҷикистону Қирғизистон ва Ӯзбекистон сурат  гирифт – имзои Шартнома оид ба нуқтаи пайвастшавии сарҳадҳои давлатии се кишвар ва Эъломияи Хуҷанд роҷеъ ба дӯстии ҷовидона. Ин як   қадами  муҳим  дар  таҳкими  эътимоди  ҳамдигарӣ,  ҳамсоягии нек ва   ҳамкории мутақобилан судманд мебошад. Бо  ин санадҳо масъалаи  расмии  хатти сарҳадҳо   ниҳоӣ   гардида,   асоси боэътимоди   сулҳу   амният ва рушди устувор   дар минтақа гузошта шуд. Ин дастовард  натиҷаи талошҳои пайвастаи   сарони  се  давлат – муҳтарам    Эмомалӣ  Раҳмон,  муҳтарам  Садир  Жапаров   ва  муҳтарам  Шавкат Мирзиёев  мебошад,  ки  бо  ҳадафи  сулҳу  суботи  пойдор  ва  ояндаи  дурахшони   халқҳоямон   кӯшиш менамоянд. Эъломияи Хуҷанд рамзи равшани дӯстии миёни мардумони Тоҷикистон, Қирғизистон ва Ӯзбекистон буда, заминаи устуворе барои рушди ҳамкориҳои иқтисодӣ, фарҳангӣ ва гуманитарӣ мегузорад. Ин санадҳо на танҳо барои давлатҳои мо, балки барои тамоми минтақа аҳамияти бузург доранд, зеро онҳо роҳи ҳамкориву пешрафтро боз ҳам ҳамвор месозанд. Дӯстии халқҳои се кишвар решаҳои амиқи таърихӣ дошта, дар тӯли асрҳо рамзи ҳамдигарфаҳмӣ ва ҳамраъйӣ будааст. Имзои ин санадҳо шаҳодати он аст, ки иродаи мардумони мо барои зиндагии осоишта ва рушду шукуфоӣ   устувор  боқӣ  мемонад.  Бигзор ин ҳамкории бародарона сол ба сол қавитар гардад ва барои наслҳои оянда сулҳ, амният ва шукуфоӣ оварад. Ман ҳамчун як шаҳрванди Тоҷикистон аз ин иқдоми бузург самимона истиқбол мекунам ва ба роҳбарони се кишвар барои саҳми арзандаашон дар таҳкими дӯстӣ ва суботи минтақа изҳори сипос менамоям.