ИЗҲОРИ ЭҲТИРОМ БА НАСЛҲОИ ҶОННИСОР: КУМАКИ ТИББИЮ МОДДӢ БА СОБИҚАДОРИ ҶАНГ   

        30 апрели соли 2025 бо ибтикори роҳбари шабакаи муассисаҳои кумаки аввалияи тиббию санитарии ноҳияи Ҷалолиддини Балхӣ Ниёзмаҳмад Қурбонов ба муносибати 80-солагии Ҷанги Бузурги Ватанӣ ба иштирокчии ин ҷанг Машраф Давлатов, кумаки моддӣ ва туҳфаҳои хотиравӣ расонида шуд.

Зимни вохӯрӣ бо собиқадори ҷанг, кормандони соҳаи тандурустӣ ба вай дорувории лозима, маводи беҳдоштӣ ва туҳфаҳои хотиравиро тақдим намуданд. Ин иқдом бо ҳадафи арҷгузорӣ ба корнамоиву ҷонфидоии иштирокчиёни ҷанг ва пос доштани хотираи таърихии наслҳои гузаштаи кишвар амалӣ гардид.

Ниёзмаҳмад Қурбонов дар суҳбат иброз дошт, ки чунин ташаббусҳо ҳамасола дар арафаи таҷлили Рӯзи Ғалаба (9 май) роҳандозӣ шуда, ҳадаф аз он тақвияти ғамхорӣ нисбати собиқадорон ва баланд бардоштани сатҳи маърифати ватандӯстӣ миёни насли наврас мебошад.

 Машраф Давлатов, ки ҳоло дар синни 99-солагӣ қарор дорад, бо эҳсоси баланд аз таваҷҷуҳи пайвастаи давлату ҳукумат ва махсусан кормандони соҳаи тиб изҳори миннатдорӣ намуд. Иқдоми мазкур бозгӯкунандаи аҳамияти пайвастани наслҳо ва гиромидошт кардани саҳми наҷибу таърихии пирони рӯзгордида дар таъмини сулҳу суботи имрӯза маҳсуб мешавад.