ТАҶЛИЛИ БОШУКӮҲИ 80-СОЛАГИИ РӮЗИ ҒАЛАБА ДАР НОҲИЯИ ҶАЛОЛИДДИНИ БАЛХӢ

      Рӯзи панҷшанбе, 8 майи соли 2025, толори Қасри фарҳанги ба номи Ҷалолиддини Балхии ноҳия мизбони як ҳамоиши бошукӯҳ гардид, ки ба 80-солагии Рӯзи Ғалаба дар Ҷанги Бузурги Ватанӣ бахшида шуда буд. Дар ин ҷамъомади тантанавӣ роҳбарияти ноҳия, аз ҷумла раиси ноҳия Холиқзода Рустам Ҳикматулло, кормандони муассисаву ташкилотҳо, намояндагони ҷомеаи шаҳрвандӣ ва сокинони фаъол ширкат варзиданд. Чорабинӣ бо сухани ифтитоҳии раиси ноҳия оғоз ёфт.

 Холиқзода Рустам Ҳикматулло бо эҳтирому қадрдонӣ аз саҳми бузурги иштирокчиёни Ҷанги Бузурги Ватанӣ ёдовар шуда, зикр кард, ки насли шуҷои мардуми тоҷик дар он замони вазнин барои ҳимояи Ватан ва ҳифзи шарафи миллӣ ба муқовимати беамон бархостанд ва осоишу суботи имрӯз низ самари ҷоннисории онҳо мебошад.

Фаромӯш набояд кард, ки насли ҷангдида ва бобокалонҳои мо дар шароити бисёр душвор рӯ ба рӯи душман истодагарӣ намуда, намунаи олии ватандӯстӣ ва далериро нишон доданд. Мо вазифадорем, ки ин корнамоиҳоро пос дорем ва ба насли наврас ҳамчун сабақи таърихӣ бирасонем,- таъкид дошт раиси ноҳия. Қайд гардид, ки ҳамасола дар арафаи Рӯзи Ғалаба собиқадорони ҷанг бо мукофотҳои пулӣ тақдим мегардад.

 Вобаста ба ин, намояндагони Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Хатлон ба аёдати иштирокчии ҷанг Машраб Давлатов рафта, кумакпулиро ба ӯ супориданд. Чорабинии идона бо барномаи фарҳангӣ, ки аз ҷониби кормандони бахши фарҳанги ноҳия омода гардида буд, идома ёфт.

Дар он шеъру сурудҳои ватандӯстона, саҳнаҳои театрикунонидашудаи ҷанговарӣ ва саҳнаҳои ҳунарӣ, ки фидокориҳои мардуми шуҷои замони ҷангро инъикос мекарданд, рӯи саҳна омада, ҳозиринро ба ваҷд оварданд. Таҷлили ин санаи муҳими таърихӣ бори дигар хотиррасон кард, ки сулҳу оромӣ ва истиқлолу якпорчагии Ватан арзишҳое ҳастанд, ки бо нархи гарон ба даст омадаанд ва ҳифзу нигаҳдории онҳо рисолати ҳар як шаҳрванди бедордил мебошад.