ОСОРХОНА - ПАЙВАНДИ НАСЛҲО

         17 майи соли 2025 ба ифтихори Рӯзи байналмилалии осорхонаҳо дар Осорхонаи таъриху кишваршиносии ноҳияи Ҷалолиддини Балхӣ чорабинии фарҳангии «Шоми дарҳои кушоди осорхона» баргузор гардид, ки таваҷҷуҳи зиёди сокинони маҳаллӣ ва дӯстдорони мероси таърихиро ҷалб кард. Дар ин чорабинии фарҳангӣ беш аз 250 нафар иштирок намуданд.

 Дар байни меҳмонон муовини раиси ноҳия Шукурзода Шаҳло, хонандагони муассисаҳои таълимӣ ва томактабӣ, волонтёрон, гирандагони стипендияҳои президентӣ, инчунин ғолибони даври ноҳиявии озмуни ҷумҳуриявии «Фурӯғи субҳи доноӣ китоб аст» ва як қатор сокинони фаъоли ноҳия ҳузур доштанд.

Иштирокчиён аз гӯшаҳои мухталифи осорхона дидан намуда, бо таърихи бой ва мероси пурғановати халқи тоҷик шинос шуданд. Бо роҳнамоии кормандони Осорхона, ба меҳмонон дар бораи ашёҳои таърихӣ, кофтаниҳои бостоншиносӣ, санъати мардумӣ ва асарҳои нодири таърихию фарҳангӣ маълумоти муфассал пешниҳод гардид.

Директори Осорхона Кароматулло Садиров иброз дошт, ки баргузории чунин чорабиниҳо барои баланд бардоштани маърифати таърихӣ, тарбияи ҳисси ватандӯстӣ ва ифтихор аз таърихи ғании миллат миёни ҷавонон хеле муҳим аст. Ӯ афзуд, ки осорхонаҳо на танҳо ганҷинаи таъриху фарҳанг, балки мактаби зиндаи омӯзиши арзишҳои миллӣ мебошанд.

Чорабинӣ дар фазои идона ва ҳувияти миллӣ баргузор шуда, бо баргузории бахши саволу ҷавоб, мусоҳиба бо меҳмонон ва намоиши барномаҳои кӯтоҳи фарҳангӣ анҷом ёфт. «Шоми дарҳои кушоди осорхона» як иқдоми муҳимест барои ҷалби бештари ҷомеа, хусусан наврасону ҷавонон ба омӯзиши таърих ва арҷгузорӣ ба мероси фарҳангии ниёгон.