БОЗДИДИ МУОВИНИ РАИСИ НОҲИЯ АЗ МАРКАЗҲОИ САЛОМАТӢ ДАР ДЕҲОТ

      Имрӯз, 23 июни соли 2025 муовини раиси ноҳияи Ҷалолиддини Балхӣ Шукурзода Шаҳло дар якҷоягӣ бо роҳбари шабакаи муассисаҳои кумаки аввалияи тиббию санитарӣ Қурбонов Ниёзмаҳмад бо мақсади шиносоӣ аз шароити хизматрасонии тиббӣ ва сатҳи фаъолияти марказҳои саломатӣ аз Ҷамоати деҳоти Навоӣ ва Ҷамоати деҳоти Навбаҳор боздид ба амал оварданд. Зимни боздид масъулин бо табибон, кормандони марказҳои саломатӣ ва аҳолии маҳаллӣ суҳбат намуда, аз наздик бо мушкилоту камбудиҳои мавҷуда шинос шуданд.

Шукурзода Шаҳло зимни суханрониаш қайд намуд, ки роҳбарияти ноҳия ба рушди соҳаи тандурустӣ аҳамияти аввалиндараҷа медиҳад ва кӯшиш ба харҷ дода мешавад, ки шароити корӣ ва сифати хизматрасонӣ ба аҳолӣ дар муассисаҳои тиббӣ пайваста беҳтар гардонида шаванд.

Ҳамчунин, роҳбари шабакаи муассисаҳои кумаки аввалияи тиббию санитарӣ Қурбонов Ниёзмаҳмад таъкид дошт, ки ҷиҳати бартарафсозии камбудиҳои ҷойдошта, таъмини муассисаҳо бо маводи доруворӣ ва таҷҳизоти зарурӣ чораҳои зарурӣ андешида мешаванд. Боздиди ҳайати масъулин нишон дод, ки новобаста ба баъзе мушкилоти мавҷуда, кормандони тиб кӯшиш менамоянд, ки ба аҳолӣ сари вақт ва бо сифати хуб хизмат расонанд.