СОХТМОНИ МУАССИСАИ ТАЪЛИМӢ БАРОИ 1400 ХОНАНДА ОҒОЗ ЁФТ

   Дар деҳаи Сабзадашти Ҷамоати шаҳраки Гулистони ноҳияи Ҷалолиддини Балхӣ  бунёди як  муассисаи нави таҳсилоти миёнаи умумии чорошёна оғоз гардид, ки барои қабули 1400 нафар хонанда дар ду баст пешбинӣ шудааст. Ин иқдом дар доираи тадбирҳои густурдаи давлату ҳукумат ҷиҳати беҳтарсозии инфрасохтори соҳаи маориф ва фароҳам овардани шароити муосири таълимӣ роҳандозӣ мегардад. Ба иттилои масъулин, айни замон корҳои омодасозӣ ва мустаҳкамкунии таҳкурсии бинои мактаб ҷараён доранд. Мувофиқи лоиҳаи сохтмон, баъди анҷоми қадамҳои аввали марҳилаи бунёдӣ рехтани бетон оғоз хоҳад ёфт. Ин раванд зери назорати муҳандисону сохтмончиёни таҷрибадор сурат гирифта, бо риояи меъёрҳои муҳандисиву сохтмонӣ пеш бурда мешавад. Гуфта мешавад, ки муассисаи мазкур бо тамоми таҷҳизоти зарурии таълимӣ, синфхонаҳои муҷаҳҳаз, озмоишгоҳҳо ва утоқҳои фаннӣ таъмин хоҳад шуд. Ҳамчунин, дар дохили муассиса толори варзишӣ ва майдончаҳои бозии кӯдакон низ пешбинӣ гардидаанд. Сохтмони ин муассисаи нави таълимӣ ҳамчун посух ба афзоиши шумораи хонандагон дар минтақа ва ниёзи рӯзафзуни аҳолӣ ба мактабҳои замонавӣ арзёбӣ мешавад. Мақомоти маҳаллӣ ва сокинони ҷамоат бунёди мактаби навро қадами муҳиме дар роҳи рушди соҳаи маориф ва таъмини сатҳи баланди таълиму тарбияи насли наврас арзёбӣ намуданд.