ҶАЛАСАИ НИМСОЛА: БАРРАСИИ ФАЪОЛИЯТИ КИ ҲХДТ ДАР НОҲИЯИ ҶАЛОЛИДДИНИ БАЛХӢ

Дар толори хурди мақомоти иҷроияи ҳокимияти давлатии ноҳияи Ҷалолиддини Балхӣ 28 июли соли ҷорӣ ҷаласаи натиҷагирӣ аз фаъолияти Кумитаи иҷроияи Ҳизби Халқии Демократии Тоҷикистон дар шаш моҳи аввали соли 2025 ва муайянсозии самтҳои фаъолият барои шашмоҳи дуюми соли 2025 баргузор гардид.

 Дар кори ҷаласа раиси ноҳия Холиқзода Рустам Ҳикматулло, намояндаи Кумитаи иҷроияи ҲХДТ дар вилояти Хатлон Раҳимзода Меҳроҷ ва раиси Кумитаи иҷроияи ҲХДТ дар ноҳия Сулаймонзода Лола иштирок ва суханронӣ намуданд. Раиси Кумитаи иҷроияи ноҳиявии ҲХДТ Сулаймонзода Лола дар оғози ҷаласа ҳисоботи муфассале оид ба кору пайкори шашмоҳаи ҳизб пешниҳод намуд.

Намояндаи Кумитаи вилоятӣ Раҳимзода Меҳроҷ зимни баромади худ фаъолияти шашмоҳаи ҳизбро дар ноҳия қаноатбахш арзёбӣ намуда, иброз дошт, ки ҷалби бештари ҷавонон ва занон ба сафҳои ҲХДТ бояд аз вазифаҳои муҳими рӯз бошад. Ӯ изҳор намуд, ки муваффақияти сиёсати давлатӣ дар оянда ба нерӯи зеҳнӣ ва созандаи ҳамин қишри ҷомеа бастагӣ дорад. Раиси ноҳия Холиқзода Рустам Ҳикматулло зимни суханронии худ баён дошт, ки соли 2025 бо баргузории интихоботи навбатии вакилон барои Тоҷикистон соли муҳим арзёбӣ мешавад. Ӯ таъкид намуд, ки ташкил ва баргузории интихобот яке аз масъулиятҳои асосии ҳизб маҳсуб ёфта, дар ин самт бояд корҳои фаҳмондадиҳӣ ва омодагӣ бо сифати баланд ба роҳ монда шаванд.

Ҳар як аъзои ҳизб бояд намунаи ибрат дар ҷомеа бошад ва ба мардум бо рафтори нек ва ҳисси баланди масъулият хидмат кунад. Дар идомаи ҷаласа нақшаи чорабиниҳои минбаъдаи Кумитаи иҷроияи ноҳиявии ҲХДТ, ки бар пояи дастуру ҳидоятҳои Пешвои миллат муҳтарам Эмомалӣ Раҳмон таҳия шудааст, тасдиқ гардид. Дар қисмати ниҳоии ҷаласа доир ба раванди маъракаи обуна ба нашрияҳои ҳизбӣ дар соли 2026 низ гузориш пешниҳод гардида, зикр шуд, ки ҳадафи ин иқдом таблиғи арзишҳои миллӣ, сиёсати созандаи ҲХДТ ва муаррифии дастовардҳои даврони соҳибистиқлолии Тоҷикистон мебошад.