ШУКӮҲИ ИСТИҚЛОЛ - ҶАШНИ ВАҲДАТ ВА ИФТИХОР ДАР ҶАЛОЛИДДИНИ БАЛХӢ

      Санаи 9 августи соли 2025 дар Боғи фарҳангу фароғатии ба номи Умари Хайёми ноҳияи Ҷалолиддини Балхӣ бо ташаббуси Ҷамоати шаҳраки Балх ва дастгирии мақомоти иҷроияи ҳокимияти давлатии ноҳия чорабинии тантанавӣ таҳти унвони «Шукӯҳи Истиқлол» баргузор гардид. Дар ин чорабинии бошукӯҳ роҳбарияти ноҳия, намояндагони ташкилоту муассисаҳои давлатӣ, фаъолони ҷомеа, сокинони маҳаллӣ, ҳунармандони бахши фарҳанг ва меҳмони вижаи барнома - сарояндаи маъруфи кишвар Акмали Тағаймуродзода ҳузур доштанд.

 Чорабинии "Шукӯҳи Иистиқлол" бо тамошои намоиши ҳунарҳои мардумӣ ва дастовардҳои кадбонуҳои ҳунарманд оғоз ёфт. Меҳмонон бо асарҳои дастӣ, маҳсулоти ҳунармандони маҳаллӣ ва таомҳои суннатии минтақа шинос гардиданд, ки рангорангӣ ва зебоии онҳо фазои идонаро боз ҳам гарму ҷаззобтар мекард. Қисмати фарҳангии чорабинӣ бо ҳунарнамоии гурӯҳҳои ҳунарии маҳаллӣ, иҷрои рақсҳои анъанавӣ ва сурудҳои ватандӯстонаи сарояндагон идома ёфт.

 Баромади Акмали Тағаймуродзода, ки бо оҳангҳои пурмазмуну дилнишин ва иҷрои эҳсосбарангезаш тамошобинонро мафтун сохт, руҳу таровати тоза ба чорабинӣ бахшид. Чорабинӣ дар фазои самимӣ, бо эҳсоси баланди ифтихор аз дастовардҳои даврони Истиқлол ва бо паёми ваҳдату ҳамбастагӣ анҷом ёфт. Ин ҷашн нишон дод, ки сокинони ноҳияи Ҷалолиддини Балхӣ бо эҳтиром ба арзишҳои миллӣ, муҳаббат ба Ватан ва кӯшишҳои пайваста барои рушди ҷомеа, дар роҳи ободию пешрафти кишвар саҳми арзанда мегузоранд.