ТОЗАКОРИҲО БА ИСТИҚБОЛИ ИСТИҚЛОЛ

         Ба истиқболи ҷашни Истиқлолияти давлатии Ҷумҳурии Тоҷикистон, ки аз муҳимтарин санаҳои таърихии кишвар ба ҳисоб меравад, дар ноҳияи Ҷалолиддини Балхӣ корҳои ободонӣ ва тозакориҳо бо маром идома доранд. Тибқи иттилои масъулин, дар ҷамоатҳои шаҳраку деҳот, назди ташкилоту идораҳо ва ҳамчунин дар шоҳроҳҳои марказии ноҳия ҳамарӯза ҳашарҳои дастаҷамъона баргузор мегарданд.

 Дар ин маъракаҳои тозакорӣ на танҳо кормандони ташкилоту муассисаҳои давлатӣ ва корхонаҳои маҳаллӣ, балки сокинони одии ноҳия низ фаъолона ширкат варзида, саҳми худро дар ободиву зебоӣ мегузоранд. Ҳадафи асосӣ аз баргузории чунин иқдомҳо на танҳо омодагӣ ба ҷашн, балки баланд бардоштани сатҳи фарҳанги шаҳрдорӣ, тозаву озода нигоҳ доштани муҳити зист ва ба сокинон эҳсоси масъулияти бештари шаҳрвандӣ бахшидан аст.

 Ҳамзамон, дар баробари корҳои тозакорӣ, рангубори иншооти иҷтимоӣ, шинонидани гулҳо ва навсозии роҳраву кӯчаҳо низ роҳандозӣ шудааст. Ин иқдомҳо симои ноҳияро наву зеботар гардонда, ба руҳияи идонаи мардуми меҳнатқарини Ҷалолиддини Балхӣ ранги тоза мебахшад. Сокинон изҳор медоранд, ки бо чунин ҳамкории дастаҷамъона ҷашни Истиқлолият бо шукӯҳу шаҳомати хоса таҷлил хоҳад ёфт ва ноҳия дар рӯзҳои ид симои тоза ба худ мегирад.