БАРГУЗОРИИ ЧОРАБИНИИ "ШУКӮҲИ ИСТИҚЛОЛ"

       Рӯзи 2 сентябри соли 2025, дар Боғи фарҳангу фароғатии ноҳияи Ҷалолиддини Балхӣ ҷамъомади тантанавӣ таҳти унвони «Шукӯҳи Истиқлол» баргузор гардид. Ин чорабинӣ бо ташаббуси раёсати кишоварзии ноҳия, дар ҳамбастагӣ бо хоҷагиҳои деҳқонӣ ва КДФ «Ба қайдгирии молу мулки ғайриманқул» роҳандозӣ шуд. Дар чорабинии идона роҳбарияти мақомоти иҷроияи ҳокимияти давлатӣ, масъулони корхонаю ташкилотҳо, намояндагони соҳаҳои гуногуни хоҷагидорӣ, фаъолон ва сокинони ноҳия иштирок намуданд.

Ҳадафи асосии баргузории ин чорабинӣ, арҷгузорӣ ба арзишҳои Истиқлолияти давлатӣ, бозтоби дастовардҳои кишоварзон ва тақвияти руҳи ватандӯстӣ миёни ҷомеа унвон мешавад. Барномаи фарҳангӣ бо суханрониҳои масъулон ва гузориши муфассал дар бораи пешрафту комёбиҳои соҳаи кишоварзӣ ва фаъолияти хоҷагиҳои деҳқонӣ оғоз ёфт. Дар идома, саҳнаи боғ бо барномаҳои ҳунарии фароғатӣ шукуфо гардида, овозхони ширинсадо Шарифхони Қурбон бо сурудҳои пурмазмуну дилнишин ҳозиринро шод гардонид.

Чунин чорабиниҳо на танҳо як василаи истироҳату фароғати оммаанд, балки заминаи мустаҳкамсозии ҳамбастагӣ ва ҳамкориҳои созанда байни мардум, кишоварзон ва сохторҳои давлатӣ маҳсуб меёбанд.