http://balkhi.tj/
ДАР ПЕШРАФТУ ТАРАҚҚИЁТИ КИШВАРИ АЗИЗАМОН БОЯД ҲАМАГОН САҲМ
2-02-2020, 20:36 | Автор: admin-balkhi | Категория: Асосӣ

Дар пешрафту тараққиёти кишвари 

азизамон бояд Ҳамагон саҳм гузорем

Ба шарофати соҳибистиқлолии Ҷумҳурии Тоҷикистон, ба ҳалли масъалаҳои иқтисодиву иҷтимоӣ, аз ҷумла беҳтар гардонидани сатҳу сифати зиндагии аҳолӣ ва тақвияти иқтидории истеҳсолии мамлакат диққати аввалиндараҷа дода мешавад.

Асосгузори  сулҳу  ваҳдатимиллӣ-Пешвои  миллат, Президенти Ҷумҳурии Тоҷикистон муҳтарам Эмомалӣ  Раҳмон дар Паёми навбатии худ рўзи 26 декабри соли 2019 ба Маҷлиси Олии Ҷумҳурии Тоҷикистон қайд намуданд, ки «Халқи сарбаланди тоҷик дар ҳама давру замон ба табақаҳои ниёзманд дасти ёрӣ дароз карда, саховату ҳимматбаландии ибратомўз нишон додааст. Ҳукумати кишвар минбаъд низ ба ин гурўҳи иҷтимоӣ, аз ҷумла ятимону маъюбон, шахсони бемору барҷомонда ва оилаҳои камбизоат кумак мерасонад».

Аз 1 сентябри соли 2020 нафақаи шаҳрвандони то 18-сола, инчунин дигар гурўҳҳои маъюбоне, ки кор намекунанд ва ба нигоҳубин эҳтиёҷ доранд, дар ҳаҷми 50 фоиз, ҳадди ақал ва ҳадди ниҳоии нафақа аз рўи синну сол ва нафақаи заминавӣ, инчунин, нафақаҳои меҳнатии шаҳрвандон 15 фоиз зиёд карда мешавад.

Инчунин музди меҳнати кормандони мақомоти ҳокимият ва идоракунии давлатӣ, муассисаҳои маориф, илм, фарҳанг, варзиш, тандурустӣ, муассисаҳои соҳаи ҳифзи иҷтимоӣ ва дигар ташкилоту муассисаҳои буҷетӣ,  инчунин, стипендияи донишҷўён ва дигар намудҳои стипендия 15 фоиз ва музди меҳнати кормандони мақомоти ҳифзи ҳуқуқ ва хизматчиёни ҳарбӣ 10 фоиз зиёд мегардад.

Мо бояд шукронаи ин ҳама неъматҳои Худованди бузург кунем. Шукрона аз он кунем, ки дар фазои амну оромӣ ва озодию якдигарфаҳмӣ ибодатҳои худро адо менамоем. Шукрона кунем, ки Ватан дорем ва моро дар тамоми дунё бо фарҳанги ғании тоҷикиамон мешиносанд ва қадр мекунанд. Набояд фаромўш кард, ки ин ҳама озодиҳо ва дастовардҳо ба шарофати Истиқлолияти давлатӣ фароҳам омадааст ва чун гавҳараки чашм онро бояд ҳифз намоем. Яке аз дастовардҳои бузургу нотак- рор дар замони Истиқлолияти Ҷумҳурии Тоҷикистон ноил гаштан ба озодии виҷдон ва эҳёи суннатҳои динӣ мебошад.       

Ҳамин аст, ки дар Конститутсияи мамлакат ва бо ҳидояти Президенти Ҷумҳурии Тоҷикистон муҳтарам Эмомалӣ Раҳмон, дар сиёсати дохиливу хориҷии давлат ҳамеша арзиш ва нақши дини мубини ислом ҳифз мегардад. 

Ҷумҳурии Тоҷикистон ҳамчун кишвари дунявӣ муносибати худро бо иттиҳодияҳои динӣ ва дар асоси ҷудо будани онҳо аз давлат созмон додааст.

Дар кишварамон озодии сиёсӣ ва озодии виҷдон кафолат дода шуда, дар даврони истиқлолияти давлатӣ дар самти тарғибу ташвиқ ва интишори ақидаи динӣ корҳои зиёде ба анҷом расонида шуданд. Зеро дин қисми таркибии рушди маънавии ҷомеа мебошад. 

Иҷрои тамоми фароизи динӣ, доштани ибодатгоҳ, ҳаҷу зиёратҳо ва иҷрои ҳамаи маросимҳои динӣ тибқи Қонуни Ҷумҳурии Тоҷикистон «Дар бораи озодии виҷдон ва иттиҳодияҳои динӣ» озод буда, бидуни монеа, маҷбурият ва таассуб амалӣ мегарданд.

Дар Ҷумҳурии Тоҷикистон ба озодии виҷдон ва эътиқоди динӣ  кафолат дода шуда, шароит ва имконият фароҳам оварда шудааст,  ки сокинони кишвар аз ҳуқуқу озодиҳои худ истифода баранд. 

Давлат ба фаъолияти иттиҳодияҳои динӣ дахолат намекунад, вале ин маънои онро надорад, ки нисбат ба тамоюлоти ҷудоиангезӣ, ифротгаро ва тундрав дар шуури динии шаҳрвандонаш бетафовут бошад.

Мо бояд сулҳу субот ва ваҳдати миллиро чун гавҳараки чашм ва сарвати бебаҳо ҳифз намоем, ба қадру манзалати истиқлолият ва давлатдории мустақилона бирасем, худро  ҳамтақдир ва ҳаммароми миллати хеш донем ва аз неъмати бузурги Ватану ватандорӣ ифтихор намоем.

Мо бояд шукрона кунем, ки ба чунин рўзгори орому осуда ва сулҳу ваҳдати комил расидаем ва ҳоло таҷрибаи нодири сулҳи тоҷиконро созмонҳои бонуфузи байналмилалӣ ва давлатҳои дунё меомўзанд.

Истиқлолияти давлатӣ ва сиёсати созандагию бунёдкоронаи Пешвои миллат Эмомалӣ Раҳмон аст, ки миллати куҳанбунёд ва фарҳангофарини мо имконият ёфт, ки ба таърих, адабиёт, фарҳанги гузашта ва нақши фарзандони барўманди худ дар ғанӣ гардонидани арзишҳои миллӣ ва умумибашарӣ, аз ҷумла дар ташаккул ва густариши  дини ислом ва таълимоти он аз наздик шиносоӣ пайдо намояд.

Дар зарфи 28 соли соҳибистиқлолӣ чашми мардуми мо дар роҳи худшиносӣ ва худогоҳии миллӣ то он дараҷа кушода гардид, ки ин амал тайи ҳазорсолаҳои пешин ба ў муяссар нагардида буд. 

Ба сиёсати пешгирифтаи Пешвои миллат нисбати ободии кишвар, таъмини осоиштагӣ ва ваҳдату ҳамзистии мардумони он, таҳаммулпазирии динҳо ва мазҳабҳои гуногуни онҳо дар ҷомеа итминони комил ҳосил кард.

Пешвои муаззами миллат муҳтарам Эмомалӣ Раҳмон дар ҳар фасли баҳор, ба умеди эҳёи комили зиёиён, рушди илми миллат ва болоравии сатҳи зиндагии маънавии мардум бо аҳли зиё, олимону донишмандон вохўриҳо намуда, назди онҳо вазифаҳо мегузорад. Ў дуруст ва бамаврид таъкид менамояд, ки «Давлат ва халқ ҳақ доранд, ки аз шумо, зиёиёни муҳтарам, дар пешбурди илм, маориф ва фарҳанг, умуман сатҳи маърифатнокии ҷомеа ба нафъи халқу Ватан самараи бештарро умедвор бошанд». 

Дар охир дуо мекунем, ки Худованд ҳамаи моро ба роҳи рост ҳидоят намояд ва дар анҷоми корҳои шоиста муваффақ бидорад.         

Дар пешрафту тараққиёти кишвари азизамон бояд ҳамагон саҳм гузорем ва қарзи шаҳрвандии худро адо намоем. Омин ё Раббал оламин.


Имомхатиби масҷиди ҷомеъ ба 

номи Баҳоваддини Нақшбанд Ҷамоати деҳоти Калинин, Шариф Рабиев
скачать dle 12.1
Просмотров: 125  |  Комментариев: (0)  |  Нашли ошибку?
Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.