ОЗМУНИ ҶУМҲУРИЯВИИ «САЙРИ ГУЛИ ЛОЛА» Ҷаласаи комиссияи озмуни ҷумҳуриявии «Сайри гули Лола» дар ноҳияи Ҷалолиддини Балхӣ барои соли 2023 таҳти раёсати намояндагон муовини якуми раиси ноҳия Холиқзода Рустам, барои муайян намудани ғолиби озмуни ҷумҳуриявии «Сайри гули Лола» аз рӯи номинатсияҳои пешниҳодгардида дар ноҳияи Ҷалолиддини Балхӣ баргузор гардид. Холиқзода Рустам, раиси комиссияи ноҳиявӣ иброз намуд, ки тибқи талаботҳои Низомномаи озмун ба Комиссияи озмун номзадии ҷамоатҳои шаҳраку деҳот аз рӯи номинатсияҳои гуногун пешниҳод шудааст. Қайд карда шуд, ки бо мақсади баланд бардоштани сатҳи донишу маърифат, фарҳангу ҷаҳонбинӣ, бедор намудани завқи зебоипарастӣ дар зеҳни ҳар як сокини ноҳия, ободу зебо намудани ҳар як хона, кӯча, деҳа, маҳалла ва сазовор пешвоз гирифтани ҷашни 35- солагии Истиқлоли давлатии Ҷумҳурии Тоҷикистон дар ноҳия озмуни «Сайри гули Лола» гузаронида мешавад. Эмомализода Баҳовиддин, котиби Комиссияи озмун, қайд намуд, ки вобаста ба иҷрои банди 5-и нақшаи чорабиниҳои Амри Президенти Ҷумҳурии Тоҷикистон аз 3 январи соли 2023, №АП-318 «Дар бораи баргузории фестивал, намоиш, ид, озмунҳо, анъана, ҳунарҳои мардумӣ ва ҷашну солгардҳо дар Ҷумҳурии Тоҷикистон барои соли 2023» баҳри вусъат додани корҳои ободонӣ, бунёдкорию созандагӣ, тарбияи ҳисси хештаншиносӣ, ватандӯстӣ, тозагии муҳити зист ва бунёд намудани гулгаштҳо дар маркази ноҳия, Ҷамоати шаҳраки Балх чораҳои амалӣ андешида шуда, бо таҷлили ҳамаҷонибаи аъзои Комиссияи ноҳиявӣ оид ба озмуни ҷумҳуриявии «Сайри гули Лола» дар ноҳияи Ҷалолиддини Балхӣ барои соли 2023 дастовардҳои сокинони Ҷамоати шаҳраки Балх ва Ҷамоати деҳоти Навобод аз рӯи номинатсияи шаҳрак ва деҳот беҳтар арзёбӣ карда шуданд. Дар ноҳия дар ҳамаи ҷамоатҳои шаҳраку деҳот ва ташкилоту муассисаҳои ноҳиявӣ оид ба ободу зебо гардонидани саҳни идораву ташкилот ва кӯчаву маҳалҳо корҳои ободонию созандагӣ ташкил гардида, рӯзҳои шанбе дар ҳамаи ҷамоатҳои шаҳраку деҳот ва ташкилоту муассисаҳо корҳои ободонӣ, гулшинонӣ ва дарахтшинонӣ баргузор шуда истодааст. Дар ин давра дар ҷамоатҳои шаҳраку деҳот ва ташкилоту муассисаҳои ноҳия ҳамагӣ гулу гулбуттаҳо 311045 дона, аз он ҷумла 8750 гули лола шинонида шудааст. Дар Ҷамоати шаҳраки Балх 2500 дона гули лола ва Ҷамоати деҳоти Навобод 3000 дона гули лола, шинонида шудааст. Аз тарафи Комиссияи ноњиявӣ оид ба озмуни ҷумҳуриявии «Сайри гули Лола» дар ноҳияи Ҷалолиддини Балхӣ ба корҳои ободонӣ, бунёдкорию созандагӣ, гулу гулзоркунии ҷамоатҳои шаҳраку деҳот ва ташкилоту муассисаҳои марбут буда, ки дар аксари онҳо гулгаштҳо ҷойгир мебошанд, баҳои воқеъбинона дода шуд. Дар марҳилаи ноҳиявии озмуни ҷумҳуриявии «Сайри гули лола» дар ноҳияи Ҷалолиддини Балхӣ барои соли 2023 Ҷамоати шаҳраки Балх, Ҷамоати деҳоти Навобод, Гулгашти Балхӣ, Боғи фарҳангу фароғатии ба номи Умари Хайём, гулпарвари беҳтарин Ҳусанова Мавҷуда Абдулаҳатовна аз Ҷамоати деҳоти Золи Зар, деҳаи беҳтарин деҳаи Иттифоқи Ҷамоати деҳоти Золи Зар ва маҳаллаи беҳтарин маҳаллаи Зарводии Ҷамоати деҳоти Навоӣ сазовори ҷойи якум дониста шуда, барои баррасӣ ба Коммисияи озмуни вилоятӣ пешниҳод карда шудааст. "НАВИДИ БАЛХ"